Fritig, 20. November: Es esch en schöne Obe gsi und er hätt no 3 Mol so guet chönne wärde, wenn ich ebe chönnt tanze. Darum: Salsa und Standardtänz lehre esch uf minere „to do-Lischte“ zrugg ide Schwiiz. Ha nur 4 Schtond gschlofe und denn chonnt de Hammer: D’Sharon (Host mother) beschwert sich, dass ich z’viel Corn Flakes iss (en richtge Zämeschiss). Die Familie esch ächt ned so, wie en Host family sött sii. Darum ide Schuel denn au es Gschpröch mitem Homestay Office gha. Damals han ich’s no als Useforderig gseh und darum gseit, dass ich d’Familie ned will wächsle. Mittlerwiile muess ich mir immer wieder klar mache, dass es „nur“ für 3 Woche esch, doch das wärde i dem Sinn langi 3 Woche wärde. Sie het scho diversi Mol hinter mim Rugge dure zu de Chind über mich gläschteret, wirft mir vor, total unselbschtändig z’sii. Ich weiss, dass ich no sött selbschtändiger wärde, doch es esch schwierig, sich inere nöie Chochi (allgemein: Umgebig) z’rächt z’finde. Ich wär jo scho bereit, für mich chli Züüg vorzbereite und z’choche, doch das chönnt jo evtl. wieder bedüüte, dass ich z’viel konsumiere. Ich ha fangs mega Müeh demit, z’gseh, dass ich irgendwie total unwillkomme bin i dere Familie und ich trau mich gar nüüt meh z’mache (doch nüt mache esch jo ebe au falsch). Wie au immer: Ich cha ned rächt mit de Host mother über das Züüg rede, sie esch vo ihrem söschtige Läbe scho gnueg gschtresst und het eigentlich nie Ziit. S’Homestay Office vo de Schuel het gmeint: Sie sind halt ebe mega beschäftigt (das halt ich für 1 Grund, wieso sie sich so benähmed), doch wenn d’Familie durch das nömm fähig wär, en Schüeler richtig uufznäh und z’betreue, denn müessti d’Familie das sälber wösse. Naja, mit mir und de Aya hend sie 2 Schüeler. Ich söll mich mälde, wenn ich s’Gfüehl ha, dass d’Situation nömm länger erträglich esch. Ich bin mir jetzt ned sicher, öb ich die Useforderig über 3 Woche söll aanäh oder d’Familie wächsle. Ich probiers wiiterhin dure z’zieh und gseh das als en Challenge.
Am Nomittag esch de Uusflog in Noosa Nationalpark gsi mitem Don (Aktivitäte-Leiter). Mir sind nur 3 Schüeler gsi, de Räscht esch be dem heisse Wätter lieber an Schtrand. So hani veli verschiedeni Eukalyptus-Böim gseh (papiirigi, scrabbly wäge Raupe, oder „normali“ graui). Offebar esch es schpeziell, dass do d’Eukalyptus-Böim bis zum Ufer wachsed. Mackaroonga-Böim und Black boys (es enorm langsam wachsends Farn) hemmer au no gseh. Tier hemmer ned so vell gseh: Ameisenäschter ide Böim, 2 Eidechsli und es paar Vögel (vor allem Brush-Turkeys, wo aber in ganz Noosa omelaufet). Es sötted offebaar au no grösseri Echse, Schlange, Schpinne und Koalas vorhande sii, doch d’Koalas seiget sit es paar Johr nömm so zahlriich im Nationalpark. Immerhin hemmer all die viele schöne Buchte gseh. Wägere Platte am Velo hani müesse de ganz lang Weg vom Park her heilaufe.
Oh, hött het d’Lara Geburtstag.