Last few days

Hoi zäme!

Tja, mittlerwiile esch mini Entdeckigsreis nach Auschtralie verbii und ich bin wieder de Hai (dehei, hehe) im gmüetleche Välte. Wie bereits in Auschtralie esch do in Välte s'Wätter im Momänt jede Tag genau gliich. Aber in Auschtralie het das gheisse, dass es jede Tag superschön esch. Do in Välte heisst das: Jede Tag grau und chalt. Aber das esch okay, denn ich bin am 2. Tag sit minere Heimreis bereits de Schnee go gnüüsse, ich bin mit Vater und Brüederli go Schiifahre in Sörebärg (bem Brienzer Rothorn obe). Traumhafts Wätter, Super-Schnee und es tolls Panorama. Nach soneme lange Sommer hani das vermisst. Und endlich hani min Schnee-Engel mache chönne. Aber zerscht mol alles de Reihe noh, denn schliesslech hani scho enorm lang nömme gschriebe do uf mim Blog. Darum au nomol "sorry!".

Uf fascht jedere Tour, woni in Auschtralie gmacht ha, hani Lüüt kenneglehrt. Uf de Kangaroo Island Tour zum Biischbiel de Sylvain vo Frankriich, d'Schwiizer David und Corina sowie d'Astrid vo Holland. Uf de Great Ocean Road Tour hani de Clancy, wo öise Guide gsi esch, und d'Babs vo Gruet ZH kenneglehrt. Die Uufzählig chönnt no lang wiiter goh. Mit es paarne wird ich viellecht in Kontakt chönne bliibe, doch mit de meischte esch es halt eifach so, dass mir för en chorzi Ziit de gliich Weg gha hend, doch nach de jewiilige Toure trennet sich öisi Wege wieder.

A eim Tag vode Great Ocean Road Tour hani Känguruhs, Emus, Koalas, en Huntsman-Schpinne und es Echidna in freier Wildbahn gseh. Es Echidna gseht uus wie en Chrüüzig vo Muulwurf und Igel. Oh, und die grossi, hoorigi, aber ungiftigi Huntsman-Schpinne esch uf mir umekrabblet und het sich's für es paar Minute i mine Hose inne gmüetlech gmacht, was denn nömm so es aagnehms Gfüehl gsi esch. Es esch aber trotzdem es loschtigs, einzigartigs Erläbnis gsi, da sie mich ned bisse het und so nätt gsi esch und wieder s'Bei dorab krabblet esch. Nebscht de 12 Aposchtel (en Klippeformation) sind mir uf dere Tour au nach Torquay, wo die grosse Marke wie Rip Curl und Quiksilver dehei sind sowie an Bells Beach, wo d'Surf-Wältmeischterschafte ame schtattfindet. Nach de Great Ocean Road Tour han ich wie bereits früehner erwähnt en onglaublech tolle Australia Day mitem James Morrison in Melbourne erläbt am 26. Januar. An exakt dem Tag hani au de Harry Senanayake kenneglehrt, wo in Sydney wohnt und mir gseit het, dass ich mich be ihm mälde söll, sobald ich in Sydney bin, sodass mir mol zäme chöned go Party mache.

Nacheme chorze Flug vo Melbourne nach Sydney am 27. Januar, bin ich am Donnschtig, 28. Januar, uf en Gratis-City-Sightseeing-Tour, wo mir durch ganz Sydney gloffe sind. Nachher bin ich über d'Sydney Harbour Bridge gloffe. Am nöchschte Tag bin ich per Fähri vo Circular Quay nach Manly Beach gfahre, was wieder en nöie Blick uf d'Sydney Harbour Bridge und s'Opera House gäh het. In Manly bin ich be sommerlichem Wätter em schöne Schtrand entlang gschlenderet, bevor ich zrugg nach Sydney und dört in Botanische Garte sowie id Art Gallery of New South Wales gange bin.

Am Samschtig, 30. Januar, het d'Hunter Valley Tour schtattgfonde. Das Gebiet esch sehr bekannt für Wii, doch nur 2,5 % vo de exportierte Wii chömed vo do, die meischte chömed vom ebefalls berüehmte Barossa Valley ide Nöchi vo Adelaide. Wie au immer: Es esch en interessante Tag gsi, mir hend fascht 20 verschiedeni Wii, 6 Sorte Bier, öppe 6 verschiedeni Chääs sowie ungfähr 7 Schnäpps/Liköör probiert a däm Tag, aber natürlech ned alles am gliiche Ort. Ein edli Fläsche Wii hani mit hei gnoh, en witeri hani als Gschänk för de Harry kauft, wo mich zobe bem Hostel zäme mit sinere Kollegin - de Jackie - i sim wiisse BMW abgholt het. Mir sind über d'Brügg in Norde gfahre und nachdem sie mir Kirri Billi House zeigt hend, sind mir ganz fein go chinesisch ässe zäme. En einzigartige Obe, wo no vell unglaublicher worde esch, wo de Harry und ich denn durch de Harbour Tunnel nach Kings Cross gfahre sind und mir in Soho Club gange sind. Er kennt de Bsitzer und so sind er ond ich als VIPs behandlet worde, hend kei Iitrett müesse zahle, hend ade lange Schlange verbii grad ine chönne und hend erscht no es paar Gratis-Drinks bechoo. Es unbezahlbars Erläbnis, denn a däm Obe han ich mich als Sydneysider chönne füehle, da ich richtig am Läbe vo de Iiheimische teilgnoh ha und i dem Club wohl de einzig Backpacker ond Ossländer gsi bin. En zwäge Cheib, de Harry. Irgendeinisch chonnt er i d'Schwiiz und denn will ich ihm ebefalls d'Möglichkeit chönne gäh, d'Schwiiz vonere andere Siite kenne z'lehre.

Am Sonntig, 31. Januar, bin ich uf d'Blue Mountains Tour. Zerscht sind mir in Featherdale National Park, wo's enorm vell auschtralischi Viecher gha het. Dommerwiis hets denn afo rägne ond wo mir zu de Blue Mountains gange sind, esch es so enorm näblig gsi, dass mer öberhaupt nüüt gseh het, vo dere söscht eigentlech tolle Uussicht.

Am Mäntig, 1. Februar, het de Büssi Geburtstag, was ich total verpennt ha (nomol sorry!). Ich ha halt viel Anders im Chopf gha, denn ich bin zerscht uf en Füehrig durchs Sydney Opera House, woni zum Biischbiel dänkt ha, dass es sicher es unglaublechs Gfüehl muess sii, wenn mer i sonere riesige Konzerthalle cha uufträtte. Denn bin ich per Bus an berüehmte Bondi Beach, doch mir persönlich het Manly besser gfalle, abgseh vo de schpezielle Klippeforme, woni südlech vo Bondi uf eme churze Marsch entdeckt ha. Zrugg die Schtadt bin ich is National Maritime Museum. Erschtuunlech, wie viel gueti Musee dass do onde Gratis-Iitrett hend. Chli schpöter bin ich denn is IMAX Kino go de 3D-Film Avatar luege. Wow! En sehr guete Film, 3D, und de gröschti IMAX-Bildschirm vo de Wält hend dä Obe zoneme witere Highlight in Sydney gmacht.

Am Zischtig, 2. Februar, 11:00, hani s'Esthi, d'Michaela Hautle und ehri Arbetskollegin, d'Tina, be de Town Hall steps troffe. Mir sind zäme via Queen Victoria Building uf d'Sydney Harbour Bridge und denn durch de historisch Schtadtteil "The Rocks". Mit de Michaela ond de Tina bin ich denn no uf de Sydney Tower, bevor au mir öis trennt hend und ich elei durch Sydney gschlenderet bin. Am Mittwoch, 3. Februar, esch bereits min letscht Tag in Sydney gsi und ich han ihn uf eme Chriegs-Schiff sowie eme U-Boot vo de auschtralische Navy vorem Maritime Museum verbrocht, bevor ich am 16:00 mit Virgin Blue vo Sydney nach Brisbane gfloge bin, erneut mit chli Bschiisse bem Check-in, damit ich ned öbergwichtigs Gepäck ha. Da in Queensland kei Sommerziit-Umschtellig gmacht wird, bin ich am 16:10 in Sydney losgfloge und sozäge am 16:20 in Brisbane aacho (eigentlich, 17:20, aber ebe Uhr 1 Schtund zruggschtelle müesse). Via Airtrain bin ich nach Fortitude Valley, woni zum Bunk Hostel gloffe bin. Ich bin nur no churz is Birdee Num Num, de Club näbedraa. Do debii hani d'Tanja und de Martin (Ruum Lozärn) kenneglehrt, wo ebefalls am 5. Febuar zrogg i d'Schwiiz flüüget, jedoch mit Singapore Airlines.

Bevor ich am Donnschtig, 4. Februar, d'Manu vor de Town Hall troffe ha, bin ich öber d'Storey Bridge ond em Fluss entlang gloffe, zum wieder chli en anderi Sicht uf d'Schtadt z'bechoo. "Du hesch dich veränderet", het sie gmeint. Aber sie het ned chönne säge, inwiefern. Per Bus sind mir uf de Mount Coot-tha, wo mir en tolle Öberblick öber d'Schtadt und ehri Umgebig gnosse hend. Nach ere planlose aber amüsante Wanderig de Hügel dorab sind mir per Bus zrugg id Schtadt und hend abgmacht, dass mer am nöchschte Tag zäme in Lone Pine Koala Sanctuary göhnd. Am Obe hani im Birdee Num Num mit de Tanja und em Martin gschnorret und "Snakebite" tronke (Cider, Bier und Sirup Mix).

Fritig, 5. Februar, letschte Tag in Auschtralie: Per Gratis-Hostelbus via Mt. Coot-tha zum Lone Pine Koala Sanctuary (en Art Tierpark) gange. Grad en Griifvogel-Show gluegt. Denn zonere Koala-Präsentation und aaschlüüssend Känguruhs gschtreichlet. Chli schpöter sind denn d'Manu und d'Sarah, en Kollegin, iitroffe. Zäme hemmer d'Känguruhs, Koalas, Schlange, Vögel etc. gnosse. Unter anderem hemmer au die bunte Papageie chönne füettere. Da mir rächt lang bliebe sind, bin ich öppe am halbi Sächsi is Hostel zrugg gschtresst, ha unterwegs no Cookies för dehei kauft und ha mich denn anderscht aagleit. Sofort grad de Airtrain zum Flughafe gnoh, woni glöcklecherwiis am zwänzg vor Sebni aacho bin, denn ich ha bis am Sebni müesse iichecke. Wow! 28 kg im grosse Rucksack… (30 kg erlaubt be Emirates)
Und so bin ich nach 2 lange Flöög (15 und 6,5 Schtund) mit 3 Schtunde Uufenthalt im Flughafe vo Dubai dezwösche am Samschtig, 6. Februar, am halbi eis im graue Zürii aacho, woni vo de Eltere abgholt worde bin.

Am Obe hend mir grad es superfeins Raclette gmacht und d'Grosseltere sind schpontan au grad no verbii cho. De 1. Tag zrugg dehei (Sonntig) hani mit Uuspacke verbrocht, doch am 2. Tag (Mäntig, 8. Februar) bin ich bereits mitem Vater und em Brüederli ab in Schnee. Ich bin mit mine aggressive Head-Carving-Schii d'Piste ufem Brienzer Rothorn und in Sörebärg go unsicher mache und ha ändlech min Schnee-Engel mache chönne. Zobe hani denn nach so langer Ziit au ändlech wieder mol in TV chönne. Dommerwiis hani mini Schultere verletzt bem Schiifahre und durch das ned so vell chönne mache. Aber ich bin öberglöcklech gsi, dass ich wieder einigi vo mine Kolleginne und Kollege gseh ha. Zum Biischbel mega lieb vo de Meli, mich is Turne z'begleite, hehe. Und denn wär do au de Raphi, wo mittlerwiile sis eigne Auto het und gärn mol mit mir möcht z'Lungere go omelungere (blöde Schpruch, ich weiss). De Wenger, wo wieder cha mitschpiele im Hockey, de Gabi, wo öis wie eh und je rächt forderet und de Dani, wo au voll debii esch.

Hött, Ziischitg, 9. Februar, de 3. Tag dehei, bin ich mich ufem RAV in Brugg go mälde. De Räscht vom Tag hani mit Uufruume, Poscht Durchwüehle und däm Blog-Iitrag Vorbereite verbrocht.