Outback - Adelaide

Nach eme tolle Qantas-Flug vo Cairns nach Alice Springs, wo mich Eukalyptusgschmack, Flöige und Hitz empfange hend, bin ich das chliine Schtädtli go erkunde. So bin ich bem Royal Flying Doctor Service, uf em ANZAC Hill sowie ineme Reptilie-Center gsi, wo sich en Olive Python um mich gschlänglet het. Die nöchschte 3 Täg hani uf The Rock Tour verbrocht. Zerscht bin ich go Kamel riite, denn sind mir 3 Schtund ide Mittagshitz rund um de Kings Canyon gloffe. Unter anderem sind mir denn au no uf en Rundwanderig be Kata Tjuta und hend de Ayers Rock z’Fuess umundet. Natürlech hend mir en Sonne-Uuf- und en -Untergang beobachtet. Au s’Schlofe zmittst im Busch unter unzählige Schtärne nacheme Znacht vom Lagerfüür esch öppis Unvergesslichs gsi. Ufem Heiweg am 3. Tag sind mir no im „ältischte Fluss vo de Welt“, em Finke River, gsi go Füess bade und hend öis zobe ide Rock Bar es letschts Mol troffe. Im Hostel hani de René troffe, wo nach verlängertem Tauche au in Alice Springs aacho esch und am nöchschte Tag uf The Rock Tour gange esch, während ich die 2-tägig Tour via Coober Pedy nach Adelaide gmacht ha.

So bin ich vom Northern Territory nach South Austraila cho. In Coober Pedy, de gröschte Opalfundschtell vo de Welt, hend mir sozäge inere Höhli, also unterirdisch, übernachtet. 70 % vo ganz Coober Pedy esch unterirdisch, zum Biischbiel au en Chile. Sinn vo de ganze Sach: Do zmittst im Outback wär’s enorm heiss ade Oberflächi, doch ide Wohnige unter Grund herrschet s’ganze Johr dure konschtant 22 - 24 Grad. Nach eme Bsuech im unterirdische Museum mit unterirdischem Kinosaal hani es chliises Schteinli kauft, bevor mir im Pizza-Restaurant (leider uf Erdoberflächi) Znacht gässe hend. Esch no witzig gsi, ide Untergrund-Bar und denn au i öisere Unterkunft, wo mir de Tenacious D - Film „Pick of Destiny“ ufeme Laptop voneme Schott gluegt hend.

Uf dene Toure hets jetzt scho mehrmals ame feini Wraps (zum sälber Zämebaschtle) gäh. Da ich während de lange Fahrt nach Adelaide gnueg Ziit gha ha, hani afo en Liischte schriibe, was ich vo Auschtraile alles vermisse wird und uf was dass ich mich fröie, zrugg ide Schwiiz wieder z’ha. Was ich zum Biischbiel sicher NED vermisse wird, esch das huuchdünne WC-Papiir (Erfolg liegt auf der Hand). Jedoch laufet ide Schwiiz alli mit Pullis ume, während do unde Hot Pants und Bikinis Alltags-Chleider sind, was d‘Küschteregione össerscht attraktiv macht, hihii.

Sonntig, 17. Januar: Jetzt bin ich in Adelaide aacho und es sind nur 21 Grad gsi, was zäme mitem Wind rächt chalt gsi esch, wenn mer immerno in Flip-Flops, churze Hose und eme T-shirt umegloffe esch. De 1. Iidruck vo dere Schtadt esch rächt guet, es het velli schöni Gebäude und sie wirkt übersichtlich und gepflegt. Hött, Mäntig, 18. Januar, bin ich no en Schoggifabrik go besichtige (Caighs Chocolate). Ja, viellecht halt well sämtlechi Schoggitafele, woni bem Abschiedsfeschtli ide Schwiiz bechoo ha, längscht gässe sind und Schoggi do unde miner Meinig noh rächt tüür esch. Es esch rächt witzig gsi, wo uf de Tour gseit worde esch, dass de de Chef vo dem Familiebetrieb dazumal i d’Schwiiz greist seig, zum be Lindt s’entschprächende Know-How z’lehre. Toblerone und Lindt sind do unde a vellne Ort erhältlich und sehr beliebt.

Ab morn gohni für 3 Täg uf Kangaroo Island, woni hoffentlich wiiterhin die traumhafti Natur und die viele schpezielle Tier vo dem Land gnüsse cha. Am 26. Januar esch Australia Day (1. Auguscht vo Auschtralie) und ich wird denn in Melbourne sii. Zur gliiche Ziit findet dört jo au s’Australian Open schtatt. Es wär schön, mol en Tennis-, en Rugby- oder en Cricket-Match ineme Schtadion z’erläbe. D’Formel 1 - Rennschtrecki gäbt’s jo denn au no, aber jetzt konzentrier ich mich zerscht uf Kangaroo Island und denn no en letschte Tag Adelaide, bevor ich via Great Ocean Road-Tour innert 3 Täg nach Melbourne reise.