Bye bye Australia!

Tja, das wär mini Entdeckigsreis in Auschtralie gsi. Ide nöchschte paar Täg wird ich versueche, d'Pönkt uf minere To-do-Lischte z'erledige, aagfange mit Schnee gnüsse, Fotos sortiere etc.. Es paar witeri Pönkt sind: Fotoalbum mache, E-Mails schicke, Wohnig sueche, Bike und Töff uf d'Saison vorbereite, Bertschi-Lüüt bsueche, de nöi Job in Aagriff näh, Schport ond Musig gnüsse, lehre en Huushalt z'füehre (Wird ändlech sälbschtändiger, Junge!), evtl. afo Gleitschirm flüüge, Tanze lehre…

Also falls ich ned immer grad för öpper oder öppis Ziit ha: Sorry, aber ich bin am läbe!

See you , mates!

Lone Pine Koala Sanctuary II

Lone Pine Koala Sanctuary I

Mt. Coot-tha

Vältner-Treff

Sydney Opera House

Sydney Harbour Bridge

St. Mary's Cathedral

Sydney Tower (Golden Bucket)

Melbourne

James Morrison

Great Ocean Road

Twelve Apostles

Show of Force in the Grampians

Last few days

Hoi zäme!

Tja, mittlerwiile esch mini Entdeckigsreis nach Auschtralie verbii und ich bin wieder de Hai (dehei, hehe) im gmüetleche Välte. Wie bereits in Auschtralie esch do in Välte s'Wätter im Momänt jede Tag genau gliich. Aber in Auschtralie het das gheisse, dass es jede Tag superschön esch. Do in Välte heisst das: Jede Tag grau und chalt. Aber das esch okay, denn ich bin am 2. Tag sit minere Heimreis bereits de Schnee go gnüüsse, ich bin mit Vater und Brüederli go Schiifahre in Sörebärg (bem Brienzer Rothorn obe). Traumhafts Wätter, Super-Schnee und es tolls Panorama. Nach soneme lange Sommer hani das vermisst. Und endlich hani min Schnee-Engel mache chönne. Aber zerscht mol alles de Reihe noh, denn schliesslech hani scho enorm lang nömme gschriebe do uf mim Blog. Darum au nomol "sorry!".

Uf fascht jedere Tour, woni in Auschtralie gmacht ha, hani Lüüt kenneglehrt. Uf de Kangaroo Island Tour zum Biischbiel de Sylvain vo Frankriich, d'Schwiizer David und Corina sowie d'Astrid vo Holland. Uf de Great Ocean Road Tour hani de Clancy, wo öise Guide gsi esch, und d'Babs vo Gruet ZH kenneglehrt. Die Uufzählig chönnt no lang wiiter goh. Mit es paarne wird ich viellecht in Kontakt chönne bliibe, doch mit de meischte esch es halt eifach so, dass mir för en chorzi Ziit de gliich Weg gha hend, doch nach de jewiilige Toure trennet sich öisi Wege wieder.

A eim Tag vode Great Ocean Road Tour hani Känguruhs, Emus, Koalas, en Huntsman-Schpinne und es Echidna in freier Wildbahn gseh. Es Echidna gseht uus wie en Chrüüzig vo Muulwurf und Igel. Oh, und die grossi, hoorigi, aber ungiftigi Huntsman-Schpinne esch uf mir umekrabblet und het sich's für es paar Minute i mine Hose inne gmüetlech gmacht, was denn nömm so es aagnehms Gfüehl gsi esch. Es esch aber trotzdem es loschtigs, einzigartigs Erläbnis gsi, da sie mich ned bisse het und so nätt gsi esch und wieder s'Bei dorab krabblet esch. Nebscht de 12 Aposchtel (en Klippeformation) sind mir uf dere Tour au nach Torquay, wo die grosse Marke wie Rip Curl und Quiksilver dehei sind sowie an Bells Beach, wo d'Surf-Wältmeischterschafte ame schtattfindet. Nach de Great Ocean Road Tour han ich wie bereits früehner erwähnt en onglaublech tolle Australia Day mitem James Morrison in Melbourne erläbt am 26. Januar. An exakt dem Tag hani au de Harry Senanayake kenneglehrt, wo in Sydney wohnt und mir gseit het, dass ich mich be ihm mälde söll, sobald ich in Sydney bin, sodass mir mol zäme chöned go Party mache.

Nacheme chorze Flug vo Melbourne nach Sydney am 27. Januar, bin ich am Donnschtig, 28. Januar, uf en Gratis-City-Sightseeing-Tour, wo mir durch ganz Sydney gloffe sind. Nachher bin ich über d'Sydney Harbour Bridge gloffe. Am nöchschte Tag bin ich per Fähri vo Circular Quay nach Manly Beach gfahre, was wieder en nöie Blick uf d'Sydney Harbour Bridge und s'Opera House gäh het. In Manly bin ich be sommerlichem Wätter em schöne Schtrand entlang gschlenderet, bevor ich zrugg nach Sydney und dört in Botanische Garte sowie id Art Gallery of New South Wales gange bin.

Am Samschtig, 30. Januar, het d'Hunter Valley Tour schtattgfonde. Das Gebiet esch sehr bekannt für Wii, doch nur 2,5 % vo de exportierte Wii chömed vo do, die meischte chömed vom ebefalls berüehmte Barossa Valley ide Nöchi vo Adelaide. Wie au immer: Es esch en interessante Tag gsi, mir hend fascht 20 verschiedeni Wii, 6 Sorte Bier, öppe 6 verschiedeni Chääs sowie ungfähr 7 Schnäpps/Liköör probiert a däm Tag, aber natürlech ned alles am gliiche Ort. Ein edli Fläsche Wii hani mit hei gnoh, en witeri hani als Gschänk för de Harry kauft, wo mich zobe bem Hostel zäme mit sinere Kollegin - de Jackie - i sim wiisse BMW abgholt het. Mir sind über d'Brügg in Norde gfahre und nachdem sie mir Kirri Billi House zeigt hend, sind mir ganz fein go chinesisch ässe zäme. En einzigartige Obe, wo no vell unglaublicher worde esch, wo de Harry und ich denn durch de Harbour Tunnel nach Kings Cross gfahre sind und mir in Soho Club gange sind. Er kennt de Bsitzer und so sind er ond ich als VIPs behandlet worde, hend kei Iitrett müesse zahle, hend ade lange Schlange verbii grad ine chönne und hend erscht no es paar Gratis-Drinks bechoo. Es unbezahlbars Erläbnis, denn a däm Obe han ich mich als Sydneysider chönne füehle, da ich richtig am Läbe vo de Iiheimische teilgnoh ha und i dem Club wohl de einzig Backpacker ond Ossländer gsi bin. En zwäge Cheib, de Harry. Irgendeinisch chonnt er i d'Schwiiz und denn will ich ihm ebefalls d'Möglichkeit chönne gäh, d'Schwiiz vonere andere Siite kenne z'lehre.

Am Sonntig, 31. Januar, bin ich uf d'Blue Mountains Tour. Zerscht sind mir in Featherdale National Park, wo's enorm vell auschtralischi Viecher gha het. Dommerwiis hets denn afo rägne ond wo mir zu de Blue Mountains gange sind, esch es so enorm näblig gsi, dass mer öberhaupt nüüt gseh het, vo dere söscht eigentlech tolle Uussicht.

Am Mäntig, 1. Februar, het de Büssi Geburtstag, was ich total verpennt ha (nomol sorry!). Ich ha halt viel Anders im Chopf gha, denn ich bin zerscht uf en Füehrig durchs Sydney Opera House, woni zum Biischbiel dänkt ha, dass es sicher es unglaublechs Gfüehl muess sii, wenn mer i sonere riesige Konzerthalle cha uufträtte. Denn bin ich per Bus an berüehmte Bondi Beach, doch mir persönlich het Manly besser gfalle, abgseh vo de schpezielle Klippeforme, woni südlech vo Bondi uf eme churze Marsch entdeckt ha. Zrugg die Schtadt bin ich is National Maritime Museum. Erschtuunlech, wie viel gueti Musee dass do onde Gratis-Iitrett hend. Chli schpöter bin ich denn is IMAX Kino go de 3D-Film Avatar luege. Wow! En sehr guete Film, 3D, und de gröschti IMAX-Bildschirm vo de Wält hend dä Obe zoneme witere Highlight in Sydney gmacht.

Am Zischtig, 2. Februar, 11:00, hani s'Esthi, d'Michaela Hautle und ehri Arbetskollegin, d'Tina, be de Town Hall steps troffe. Mir sind zäme via Queen Victoria Building uf d'Sydney Harbour Bridge und denn durch de historisch Schtadtteil "The Rocks". Mit de Michaela ond de Tina bin ich denn no uf de Sydney Tower, bevor au mir öis trennt hend und ich elei durch Sydney gschlenderet bin. Am Mittwoch, 3. Februar, esch bereits min letscht Tag in Sydney gsi und ich han ihn uf eme Chriegs-Schiff sowie eme U-Boot vo de auschtralische Navy vorem Maritime Museum verbrocht, bevor ich am 16:00 mit Virgin Blue vo Sydney nach Brisbane gfloge bin, erneut mit chli Bschiisse bem Check-in, damit ich ned öbergwichtigs Gepäck ha. Da in Queensland kei Sommerziit-Umschtellig gmacht wird, bin ich am 16:10 in Sydney losgfloge und sozäge am 16:20 in Brisbane aacho (eigentlich, 17:20, aber ebe Uhr 1 Schtund zruggschtelle müesse). Via Airtrain bin ich nach Fortitude Valley, woni zum Bunk Hostel gloffe bin. Ich bin nur no churz is Birdee Num Num, de Club näbedraa. Do debii hani d'Tanja und de Martin (Ruum Lozärn) kenneglehrt, wo ebefalls am 5. Febuar zrogg i d'Schwiiz flüüget, jedoch mit Singapore Airlines.

Bevor ich am Donnschtig, 4. Februar, d'Manu vor de Town Hall troffe ha, bin ich öber d'Storey Bridge ond em Fluss entlang gloffe, zum wieder chli en anderi Sicht uf d'Schtadt z'bechoo. "Du hesch dich veränderet", het sie gmeint. Aber sie het ned chönne säge, inwiefern. Per Bus sind mir uf de Mount Coot-tha, wo mir en tolle Öberblick öber d'Schtadt und ehri Umgebig gnosse hend. Nach ere planlose aber amüsante Wanderig de Hügel dorab sind mir per Bus zrugg id Schtadt und hend abgmacht, dass mer am nöchschte Tag zäme in Lone Pine Koala Sanctuary göhnd. Am Obe hani im Birdee Num Num mit de Tanja und em Martin gschnorret und "Snakebite" tronke (Cider, Bier und Sirup Mix).

Fritig, 5. Februar, letschte Tag in Auschtralie: Per Gratis-Hostelbus via Mt. Coot-tha zum Lone Pine Koala Sanctuary (en Art Tierpark) gange. Grad en Griifvogel-Show gluegt. Denn zonere Koala-Präsentation und aaschlüüssend Känguruhs gschtreichlet. Chli schpöter sind denn d'Manu und d'Sarah, en Kollegin, iitroffe. Zäme hemmer d'Känguruhs, Koalas, Schlange, Vögel etc. gnosse. Unter anderem hemmer au die bunte Papageie chönne füettere. Da mir rächt lang bliebe sind, bin ich öppe am halbi Sächsi is Hostel zrugg gschtresst, ha unterwegs no Cookies för dehei kauft und ha mich denn anderscht aagleit. Sofort grad de Airtrain zum Flughafe gnoh, woni glöcklecherwiis am zwänzg vor Sebni aacho bin, denn ich ha bis am Sebni müesse iichecke. Wow! 28 kg im grosse Rucksack… (30 kg erlaubt be Emirates)
Und so bin ich nach 2 lange Flöög (15 und 6,5 Schtund) mit 3 Schtunde Uufenthalt im Flughafe vo Dubai dezwösche am Samschtig, 6. Februar, am halbi eis im graue Zürii aacho, woni vo de Eltere abgholt worde bin.

Am Obe hend mir grad es superfeins Raclette gmacht und d'Grosseltere sind schpontan au grad no verbii cho. De 1. Tag zrugg dehei (Sonntig) hani mit Uuspacke verbrocht, doch am 2. Tag (Mäntig, 8. Februar) bin ich bereits mitem Vater und em Brüederli ab in Schnee. Ich bin mit mine aggressive Head-Carving-Schii d'Piste ufem Brienzer Rothorn und in Sörebärg go unsicher mache und ha ändlech min Schnee-Engel mache chönne. Zobe hani denn nach so langer Ziit au ändlech wieder mol in TV chönne. Dommerwiis hani mini Schultere verletzt bem Schiifahre und durch das ned so vell chönne mache. Aber ich bin öberglöcklech gsi, dass ich wieder einigi vo mine Kolleginne und Kollege gseh ha. Zum Biischbel mega lieb vo de Meli, mich is Turne z'begleite, hehe. Und denn wär do au de Raphi, wo mittlerwiile sis eigne Auto het und gärn mol mit mir möcht z'Lungere go omelungere (blöde Schpruch, ich weiss). De Wenger, wo wieder cha mitschpiele im Hockey, de Gabi, wo öis wie eh und je rächt forderet und de Dani, wo au voll debii esch.

Hött, Ziischitg, 9. Februar, de 3. Tag dehei, bin ich mich ufem RAV in Brugg go mälde. De Räscht vom Tag hani mit Uufruume, Poscht Durchwüehle und däm Blog-Iitrag Vorbereite verbrocht.

Pelican Bay @ Kangaroo Island

Surfing at Middleton

Unstoppable

Ja, die letschte paar Taeg sind enorm gsi. Zum Glueck schriib ich mir jede Tag uuf, was ich so erlebe, denn do esch jede Tag es riesigs Adventure. Kangaroo Island esch super gsi. Great Ocean Road Tour esch au wunderschoen gsi, und Melbourne, woni geschter waehrend em Australia Day (1. Auguscht vo Auschtralie) erlebt ha, esch einzigartig gsi. En riesigi Schtadt. Pure Zuefall, dass ich erfahre ha, dass de weltbekannti Trompete-Schpieler James Morrison ineme Park schpielt. Nach dem Open air Konzertli bin ich uebergluecklech gsi, erscht recht da ich no es Autogramm vo ihm bechoo ha. Hmmm...zu all dem (Kangaroo Island, Great Ocean Road und Melbourne) haetti sooooo viel z`verzelle, aber ich bruuche d`Ziit lieber zum wiiterhin so viel z`erlebe. So hend ihr zwar kei News ufem Blog, aber ich erlebe umso meh und es wird umso interessanter, wenn mer ois ide Schwiiz wieder gsaehnd. Und schliesslich bliibt mer noemm vell Ziit. Hoett Nomittag (27. Januar) flueg ich vo Melbourne nach Sydney mit Tiger Airways fuer ca. 80.--. Waehrend dene 6 Taeg Sydney moecht ich die uebliche Tourischte-Attraktione gseh, wird en Tour is Wiigebiet Hunter Valley plus eini id Blue Mountains mache und moecht wenn irgendwie moeglich am 2. Februar s`Esthi und d`Michaela gseh, wo denn au in Sydney sind. Schoescht hani geschter no eine kenneglehrt, wo in Sydney wohnt und mir es paar gueti Bars zeige wuerd. Mol luege, ob ich das alles erlebe wird.

Also, churz und buendig gseit: Sorry, dass ich ned meh schriibe und kei noii Fotos liefere, aber ich bin immerno voller Neugier und Lebensluscht und darum nonstop unterwegs. Jetzt, wo`s em End entgege goht, fohni`s erscht recht afo gnuesse, obwohl ich chuum mag warte, bis ich ide Schwiiz en Schnee-Engel mache cha. See you, mates!

Coober Pedy

Uluru

Kata Tjuta

Kings Canyon

Camel riding

Olive Python

Outback - Adelaide

Nach eme tolle Qantas-Flug vo Cairns nach Alice Springs, wo mich Eukalyptusgschmack, Flöige und Hitz empfange hend, bin ich das chliine Schtädtli go erkunde. So bin ich bem Royal Flying Doctor Service, uf em ANZAC Hill sowie ineme Reptilie-Center gsi, wo sich en Olive Python um mich gschlänglet het. Die nöchschte 3 Täg hani uf The Rock Tour verbrocht. Zerscht bin ich go Kamel riite, denn sind mir 3 Schtund ide Mittagshitz rund um de Kings Canyon gloffe. Unter anderem sind mir denn au no uf en Rundwanderig be Kata Tjuta und hend de Ayers Rock z’Fuess umundet. Natürlech hend mir en Sonne-Uuf- und en -Untergang beobachtet. Au s’Schlofe zmittst im Busch unter unzählige Schtärne nacheme Znacht vom Lagerfüür esch öppis Unvergesslichs gsi. Ufem Heiweg am 3. Tag sind mir no im „ältischte Fluss vo de Welt“, em Finke River, gsi go Füess bade und hend öis zobe ide Rock Bar es letschts Mol troffe. Im Hostel hani de René troffe, wo nach verlängertem Tauche au in Alice Springs aacho esch und am nöchschte Tag uf The Rock Tour gange esch, während ich die 2-tägig Tour via Coober Pedy nach Adelaide gmacht ha.

So bin ich vom Northern Territory nach South Austraila cho. In Coober Pedy, de gröschte Opalfundschtell vo de Welt, hend mir sozäge inere Höhli, also unterirdisch, übernachtet. 70 % vo ganz Coober Pedy esch unterirdisch, zum Biischbiel au en Chile. Sinn vo de ganze Sach: Do zmittst im Outback wär’s enorm heiss ade Oberflächi, doch ide Wohnige unter Grund herrschet s’ganze Johr dure konschtant 22 - 24 Grad. Nach eme Bsuech im unterirdische Museum mit unterirdischem Kinosaal hani es chliises Schteinli kauft, bevor mir im Pizza-Restaurant (leider uf Erdoberflächi) Znacht gässe hend. Esch no witzig gsi, ide Untergrund-Bar und denn au i öisere Unterkunft, wo mir de Tenacious D - Film „Pick of Destiny“ ufeme Laptop voneme Schott gluegt hend.

Uf dene Toure hets jetzt scho mehrmals ame feini Wraps (zum sälber Zämebaschtle) gäh. Da ich während de lange Fahrt nach Adelaide gnueg Ziit gha ha, hani afo en Liischte schriibe, was ich vo Auschtraile alles vermisse wird und uf was dass ich mich fröie, zrugg ide Schwiiz wieder z’ha. Was ich zum Biischbiel sicher NED vermisse wird, esch das huuchdünne WC-Papiir (Erfolg liegt auf der Hand). Jedoch laufet ide Schwiiz alli mit Pullis ume, während do unde Hot Pants und Bikinis Alltags-Chleider sind, was d‘Küschteregione össerscht attraktiv macht, hihii.

Sonntig, 17. Januar: Jetzt bin ich in Adelaide aacho und es sind nur 21 Grad gsi, was zäme mitem Wind rächt chalt gsi esch, wenn mer immerno in Flip-Flops, churze Hose und eme T-shirt umegloffe esch. De 1. Iidruck vo dere Schtadt esch rächt guet, es het velli schöni Gebäude und sie wirkt übersichtlich und gepflegt. Hött, Mäntig, 18. Januar, bin ich no en Schoggifabrik go besichtige (Caighs Chocolate). Ja, viellecht halt well sämtlechi Schoggitafele, woni bem Abschiedsfeschtli ide Schwiiz bechoo ha, längscht gässe sind und Schoggi do unde miner Meinig noh rächt tüür esch. Es esch rächt witzig gsi, wo uf de Tour gseit worde esch, dass de de Chef vo dem Familiebetrieb dazumal i d’Schwiiz greist seig, zum be Lindt s’entschprächende Know-How z’lehre. Toblerone und Lindt sind do unde a vellne Ort erhältlich und sehr beliebt.

Ab morn gohni für 3 Täg uf Kangaroo Island, woni hoffentlich wiiterhin die traumhafti Natur und die viele schpezielle Tier vo dem Land gnüsse cha. Am 26. Januar esch Australia Day (1. Auguscht vo Auschtralie) und ich wird denn in Melbourne sii. Zur gliiche Ziit findet dört jo au s’Australian Open schtatt. Es wär schön, mol en Tennis-, en Rugby- oder en Cricket-Match ineme Schtadion z’erläbe. D’Formel 1 - Rennschtrecki gäbt’s jo denn au no, aber jetzt konzentrier ich mich zerscht uf Kangaroo Island und denn no en letschte Tag Adelaide, bevor ich via Great Ocean Road-Tour innert 3 Täg nach Melbourne reise.

Diving in Great Barrier Reef

Lagoon Cairns

Kuranda Skyrail

Cape Tribulation Beach

Daintree National Park

Lighthouse at Cooktown

Cooktown

Josephine Falls

PADI Diving licence in Great Barrier Reef

Mir hend öise Wicked Camper ohni Problem am 6. Januar in Cairns abgäh und sind is Bohemia Central Hostel, wo zmittst ide Schtadt esch. Nach 2 fuule Täg ide Lagune vo Cairns und im Hostel, hani vom Fritig, 8. Januar, bis Mäntig, 11. Januar, be Down Under Dive s’Tauchbrevet gmacht (PADI Open water). Somit chani bis 18 Meter töif tauche. Ich bin 1 Tag vorher no ineme Barber shop für 15 $ go Höörli schniide loh. Zum Tauchbrevet: Nach ere ärztliche Untersuechig (F**K! Fehlends Turne und z’viel feins Ässe = ich bin ca. 76 kg schwer) hend de René und ich zäme mit 2 Franzose, em Poitr vo Pole sowie eme Auschtralier 2 Täg Theorie und Üebe im Swimming pool (3m) mit öisne Kursleiter Ryan und Kane (vo Tasmanie) gha. Das esch scho rächt interessant gsi und es het Schpass gmacht, die Gerät genauer kennez’lehre und uusz’probiere. Am 10. Januar sind mir denn mit de Osprey V be rauher See (aber schönem Wetter ufem Meer uss) zum Saxon Reef gfahre und sind s’erscht Mol im Meer, im Great Barrier Reef, go tauche. Eifach einmalig, die Unterwasserwelt: Koralle und Fisch in alle Farbe in aagnehm warmem Wasser (ca. 28 Grad). Au es paar Clownfisch (Nemo)sowie en grossi Schildchrott hemmer uf 11 Meter gseh. Oder au Triggerfish, wo relativ aggressiv chöned sii im Moment, da Bruetziit esch. Die schwimmet ineme Chreis um ihres Heim und jedes Lebewese, wo i dä Chreis chonnt, wird aagriffe, egal wie gross dass es esch (also au Haifisch und Mönsche). Well ich bem Abtauche d’Maske chli z’hööch aagha ha, hani de Druck uf de Maske ned durch Uusschnuufe durch d’Nase chönne uusgliiche und ha darum bluetunterloffni Augeränd bechoo, als ob ich zwöi Füüscht kassiert hätt. Wieder öppis glehrt: How to prevent a squeeze. Nacheme feine BBQ-Zmittag hend mir diversi Üebige bem Hastings Reef gmacht. Do hemmer no Trompetefisch gseh und ich ha min Schpass mit blaue Fischli gha, wo ihri Farb zu grüen wächslet, wenn mer sie mit de Hand chli schtört. Denn hani au no en Seegurke knuddlet. Nach ca .33 Minute esch dä Tauchgang au scho wieder verbii gsi. Nochli gschnorchlet, denn sind mir zrugg is verrägnete Cairns gfahre (wieder chli mulmig worde während de Fahrt, aber ha’s ohni Tablette probiert und au gschafft. Ich ha mir übrigens en professionelli Maske und en superguete Schnorchel kauft. Am 11. Januar sind mir nomol bem Saxon und Hastings Reef go tauche, wieder rächt windig gsi. Jedes Mol hani wieder es paar nöii Fischarte entdeckt, au en Seeschtärn hani gseh. Nur schaad, dass ich nie en Hai gseh ha.

Morn, 12. Januar, 11:25 Uhr, flüüg ich mit Qantas vo Cairns nach Alice Springs. De René bliibt es paar Täg länger in Cairns, doch mer wärdet öis in Alice oder Adelaide wieder gseh. Da ich im Outback non-stop uf Toure bin, wird de nöchscht Iitrag wohl uf sich warte loh. Ich bin froh, dass ich d’Wanderschueh endlich cha bruuche, wo bis jetzt nur Ballascht gsi sind. Hoffentlich esch mis Gepäck ned z’schwer, es sind glaub nur 23kg plus 7kg carry-on luggage erlaubt… Wie au immer: Es bliibt ned mol meh 1 Monet und ich ha no vieles vor mir. Glücklicherwiis fühl ich mich grossartig und bin nach wie vor voller Energie. Bin gschpannt, wie’s wird sii im Red Centre.

Happy new year!

Ja, ich ha s’nöie Johr füechtfröhlich in Aagriff gnoh. Füecht, well’s do in Cairns enorm vell rägnet (Räägeziit) und fröhlich sowieso, denn de René und ich hend für 4 Liter Cabernet Sauvignon (Goon) für 14.-- im Plastiksack kauft und ide Lagune mit Livemusig, zwöi riesige Füürwerk und vielne andere Lüüt zäme Nöijohr gfiiret. Eigentlich esch Alkoholkonsum ide Öffentlichkeit do verbote, aber mir hend das mit chli Vorsicht wäg de Polizeipatrouille guet anebrocht. Well’s aber grägnet het, sind mir nach Mitternacht ziemlich rasch zrugg in Camper. Trotz ca. 1 Liter Goon pro Person het keine vo öis beidne irgendwelchi Kater-Aazeiche gha am nöchschte Morge wo um 9:00 Uhr d’SMS vode Schwiiz cho sind, wo s’nöie Johr erscht grad aagfange het. Goon esch guet! =o) De Rescht vom 1. Januar 2010 han ich bruucht zum z’Fuess Cairns z’erkunde und ide Lagune bi sonnig heissem Wetter z’bade (endlich mol kei Rääge meh).


Samschtig, 2. Januar 2010

Nacheme schöne, sonnige Nomittag am 1. Januar, hets am 2. Januar natürlech wieder mächtig grägnet. Anschtatt de Daintree Nationalpark, Mossman Gorge (en Schlucht) und Port Douglas z’bsueche, sind mir darum denn nach Port Douglas, wo’s au voll grägnet het, also sind mir liecht durch’s Hinterland nach Cooktown gfahre. Unterwegs hets sehr viel Wallabies und Kaenguruhs näbem Schtrasserand gha, zum Teil rächt gföhrlech gsi zum Fahre, wenn sie vorem Auto dure ghüpft sind. Cooktown esch es chliises Dörfli. Do hend Europäer s’erscht Mol Känguruhs gseh, wo de Captain Cook zum erschte Mol sin Fuess uf Auschtralie gsetzt het. Mer hend s’schöne Wetter gnosse und au grad dört übernachtet.


Sonntig, 3. Januar 2010

Mir sind be schoenem Wetter vo Cooktown ueber die mit Kaenguruhs und Schmetterling ueberfuellti Schtrass via Lakeland, Mt. Carbine (wo mir s`laengschte, beschpielbare Didjeridoo gseh hend) zu Mossman Gorge. Da waer en Schlucht. Leider muend sie grad en Bruegg saniere, also hend mir nur en chlini Tour durch de Raegewald choenne mache und hend denn aber im Fluss mit Barsche zaeme badet. Denn sind mir per Faehri ueber de Daintree River bis nach Cape Tribulation, wo de Captain Cook damals uf Grund gloffe esch ufem Riff. Einmaligs Erlebnis, so mitem Camper zmittst durch de tuefi Raegewald z`fahre. Mir sind denn aber wieder zrugg uf d`Faehri gfahre und bis nach Cairns zrugg, nomol em Captain Cook Highway noche, wo als Miniatur-Great Ocean Road bezeichnet wird, well do d`Schtross Axenschtross-maessig de Kueschte und Schtraend entlang verlauft.


Maentig, 4. Januar 2010

Hoett sind mir unwiit vo Cairns i d`Gondelbahn nach Kuranda iigschtiege. Die sogenannti Skyrail verlauft 7.5 Kilometer lang ueber de Raegewald. Es esch genial, de Raegewald mol us de Perschpektive voneme Vogel z`gseh, wo knapp ueber d`Baumkrone gleitet.

Es bliibet no 2 Täg. Vom 6. bis 12. Januar uebernachtet mir ineme Hostel in Cairns, während mir s’Tauchbrevet im Great Barrier Reef (nach Theorie und Uebe ineme Pool) mached.

Am 12. Januar goht`s fuer mich (nach Abschied vom Rene) nach Alice Springs, woni zerscht 3 Täg uf The Rock Tour goh rund um de Ayers Rock und denn während 2 Täg via Coober Pedy (Dorf für Opalgwönnig, komplett unter Erde, well’s ide Wüeschti so heiss esch) nach Adelaide reise. Falls ich denn de Blog ned aktuell halte, esch es, well ich zmittst im Nirgendwo vo dem riesige Land am Umegurke bin.