Fortsetzig vo letschter Woche in Noosa

Donnschtig, 10. Dezember: Ich bin mit em Päckli i d’Schuel gloffe. I däm Päckli hani luuter Proschpäkt, Souveniir, es paar Chleider und vieles meh, woni uf de Reis ned bruuche wird. Nach de Schuel hani bereits mis Zertifikat bechoo, damit ich das zäme mit de Schuelbüecher au grad heischicke cha. Uf de Poscht het sich zeigt, dass es 7 Kilo schwer wär. Das wär scho rächt tüür worde. Darum hani halt wieder einiges usegnoh, sodass ich denn aber trotzdem no über 50.-- für es Päckli vo 5 Kilo zahlt ha. Und das per Sea mail! Es wird in ca. 3 Mönet dehei aacho. Wenn ich’s per Luftposcht wörd schicke, wär’s in 2 Woche dehei, aber es wörd über 120.-- choschte aber es het jo nüüt drin, wo enorm dringend dehei sött sii. Denn bin ich direkt go tschutte mit vielne andere vode Schuel. Ich weiss jetzt, was ich vermisse: de Teamschport. Ich sött glaub doch afo so blödi Üebige wie Rumpfbüügine mache, denn wenn ich jetzt denn nömm ide Schuel bin, esch Teamschport nömm möglech, ich ha’s jo jetzt scho vermisst, obwohl ich wenigschtens 1 Mol ide Woche ha chönne ide Hitz go umeseckle und alli Cookies useschwitze. D’Sharon und de Kyle sind weg am Obe und ich ha fixfertig packt und no per Telefon wie vorgschriebe 1 Tag vorher d’Unterkunft in Brisbane beschtätige loh. Sämtlechi Aktivitäte und Unterkünft müend gemäss Tribaltravel 1 Tag vorher per Telefon bestätigt wärde und ich sött denn jewiils au aalüüte, wenn ich voneme Transit Center wott abgholt wärde. Jetzt no en halbe Tag Schuel und denn esch mini Ziit be de Familie und ide Global Village Schuel verbii. Dementschprächend hani en rächt coole letschte Obe gha ide Koala Bar und im Irish Murphy’s. Ich bin bachnass vom Umetanze und es het es paar witzigi Fötteli gäh. Öppe Morge am halbi drüü bin ich denn is Bett.

Fritig, 11. Dezember: Hött Morge nach de Pause hend mer ide Klass de Abschied vode Delphine (Neuchâteloise), em Mucio (Brasilianer) und mir gfiiret. Für das hani de ganz Läbchueche iipackt, denn d’Familie het ned gärn Zimt. Schlussändlech han ich vergässe, de Läbchueche z’serviere, doch das esch umso besser für mich gsi, denn so hani während de folgende Täg in Brisbane und au no in Byron Bay de ganz Läbchueche elei gässe…hihi. Mir hend gnueg anders gha zum öise Abschied fiire. Eventuell hani jetzt de Yoon, mini Lehrerin Annette und alli andere vo minere Klass zum letschte Mol gseh. Mitem Südkoreaner Yoon sött ich unbedingt in Kontakt bliibe, er esch en zwäge Cheib. Er cha sogar chli düütsch (Du bist hübsch. Holen Sie mir bitte ein Bier. Sonne.), das lehrt er offebaar in Südkorea ide Schuel uf sim Weg zum Aawalt oder Autor.

D’Sharon, mini Host mother, het mich am halbi drüü zum Noosa Transit Center gfahre während ihrer Mittagspause. Es paar Sache vo mir wird ich inere Woche wieder go abhole, wenn ich mitem Campevan vo Brisbane her chome. Mit chli Veschpätig bin ich denn am 15:50 per Greyhound Bus nach Brisbane gfahre. Es esch en enorm heisse Tag gsi und ich ha 2 schweri Rucksäck gha.