My thongs

Cassowary at Mission Beach

Radical Bay

Balding Bay Magnetic Island

Airlie Beach - Cairns

Mir hend öis vo de Kolleginne und Kollege vo Mandrake, vo Airlie Beach und sim Nachtlebe verabschiedet und sind am Zischtig, 29. Dezember, nach Townsville gfahre, wo mir d’Fähri uf Magnetic Island (für Iiheimischi eifach Maggie Island) gnoh hend für 29.-- $. Da mir zu Silveschter in Cairns wänd sii, was no en rächt langi Schtrecki esch, sind mir öis vorcho, wie die japanische Tourischte in Europa, wo innert churzer Ziit möglechscht viel wänd gseh. Nur dass es be öis ned Europa, sondern ebe Maggie Island esch. So sind mir vo Horseshoe Bay, wo mir mitem Bus anegfahre sind, zu Balding Bay und Radical Bay (zwöi abglegne, schöne Buchte) gloffe. Es esch össerscht heiss gsi. Zrugg im grosse Townsville hend mir zum Znacht ufem BP Truck stop Maccaronis mit Bolo-Sauce ufem Gas-Chocher gmacht. Irgendeinisch wärdet mer au mol „Goon“ chaufe, das esch de Übername für 4 Liter Wiiswii im Plastiksack, wo für 11 $ erhältlich esch. Ja, Bier esch do unde tüürer als Wii.

Mittwoch, 30. Dezember: Die grosse, lange Trucks, wo do unterwegs sind, sind beiidruckend. Nachdem mir Townsville vom Castle Hill Lookout es letschts Mol aagluegt hend, sind mir nach Mission Beach gfahre. Unterwegs het de René inere Polizeikontrolle müesse bloose. Mittlerwiile merket mir, dass d’Räägeziit do i däm tropische Norde vo Queensland aagfange het, denn während em Fahre hets es paar Mol schlagartig heftig grägnet, doch es hört jewiils genauso schnell wieder uuf. Uf de Rainforest walks in Mission Beach hend mir Fisch und en Schildchrott gseh, aber leider keine vo de sältene Kasuare, wo nur do ide Region aaz’träffe wäret. Während 20 Minute Internetzuegriff hani rasch s’Video vo mim Fallschirmschprung gseh (aber ohni Ton). Do esch nomol de Link (als URL iigäh, denn min Vor- und Nachname iigäh, 2x uf Play/Pause drücke und los goht‘s): www.goskydive.com.au/gallery.html
Am Schtrand vo Mission Beach hend mir gschützt durch Stinger nets badet und unter Palme s’Nüüt-Mache gnosse, bevor mir feini Känguruh-Filets zum Znacht grilliert hend.

Hött, New Year’s Eve, sind mir nach Cairns gfahre und wärded zobe hoffentlich füechtfröhlich Neujohr fiire, wenn dehei ide Schwiiz erscht Zmittag am Drüü esch. Ich ha mir no kei gueti Vorsätz gfasst und weiss immer nonig, ob ich Jugi-Leiter söll mache oder ned…

Skydive Video

Mittlerwiile esch s`Video vo mim Fallschirmschprung in Ballina im Internet z`gseh, und zwar wenn mer unter folgendem Link min Vor- und Nachname iitippet:
www.goskydive.com.au/gallery.html

Mandrake

Whitehaven Beach at Whitsunday Island

Airlie Beach

Cape Hillsborough

X-mas & Whitsunday sailing

Ich ha do unde sehr schpezielli Wiehnachte erlebt: Kaenguruhs am Schtrand am Morge in Cape Hillsborough, denn riesigi Eidechse und well do in Airlie Beach an Wiehnachte natuerlech kei Lade offe het, esch mis Wiehnachtsmenu Fish & Chips gsi (en feine Barramundi-Fisch) plus en Mango/Rum-Raisin-Glace vo Cold Rock. Vorher bin ich no ide Lagune unter Palme go bade. Ide Nacht sind mir voneme Security Maa Morge am 3:00 gweckt worde und hend muesse en andere Schlofplatz mit oisem Camper sueche. Also die Wiehnachte wird ich glaub ned so schnell vergesse...

Am Samschtig, 26. Dezember, sind de Rene & ich zaeme mit englische Girls, es paar Franzose und Ire uf die ehemalig Racing Yacht namens Mandrake. D`Virginie esch oises Maedchen fuer alles gsi, de Dave oise Captain. So hani fuer 2 Taeg und 2 Naecht uf eme Segelboot glebt. Esch en unvergessliche Trip gsi. Innert dere Ziit hani superfein gaesse, ha en churze Bushwalk gmacht und choenne mithelfe bim Segel setze. Mir sind 4 Mol go schnorchle. Unglaublich, die Farbe vode Fisch und Koralle. Eifach unbeschriiblech. Im erscht Moment, woni die schoene Fisch gseh ha, hani a das Buech vom Regebogefisch daenkt, wo`s im Chindergarte ame get. Nebscht enorm viel verschiedene Fisch hani wieder riesigi Schildchroett, en Sea Eagle, sehr viel Qualle und en abnormal grossi Schpinne gseh. Ich ha au bis ca. 1 Meter an en Schtachelroche ane choenne schwimme. Am letschte Obe sind mir per Gummiboot ines Pub, wo ufere Insle esch. Ich ha interessanti Trinkschpieli glehrt. =o)

Jetzt, Maentig, 28. Dezember, bin ich zrugg in Airlie Beach und es esch (wie immer) enorm heiss. Hoett Obe waerdet mir s`Nachtlebe vo Airlie Beach gnuesse, bevor mir morn nach Townsville waend wiiterfahre. Vo doert goehnd mir eventuell uf Magnetic Island.

Driver Fatigue Zone

Cape Hillsborough

Yaamba - Airlie Beach

Wie scho uf em Weg nach Rockhampton, sind zwösche Yaamba und Mackay am Donnschtig, 24. Dezember, rächt viel Känguruh-Kadaver am Schtrosserand gsi. Die wiit verbreitete Chrääie hend ihri Fröid draa gha. In Mackay bin ich für 5 $ ineme Veloshop für 1 Schtund is Internet. Es esch fängs zuneme coole Abentüür worde, dä Road trip along Australia’s East Coast. Dä Obe wird definitiiv eine vo de beschte vom ganze Road trip sii, denn s‘Cape Hillsborough Resort im Nationalpark esch wunderschön, mir hend de Camper ide 1. Reihe (nur es paar Böim, Schtrüücher und Palme trennet öis vom Schtrand), sit 2 Täg endlich wieder en Duschi und erscht no en Schpiegel! Zudem no öises Heilig-Obe-Feschtässe: Feini Filets ufem Grill mit Barbecue Sauce, dezue Salat. Do ufem Campingplatz hets wildi Känguruhs und Wallabies. Es esch einzigartig gsi, wo mir öisi Wösch am Schtewi uufghänkt hend, umringt vo Känguruhs wo am Graase sind.

Das Erlebnis esch wiitergange am nöchschte Morge, Wiehnachte, 25. Dezember, am halbi Sechsi. Ich bin an Schtrand gloffe und dört sind alli Känguruhs und Wallabies im Sand umeghüpft ide Morgesonne. Das het es paar tolli Bilder gäh. Denn sind de René und ich durch de Nationalpark gloffe, zu de Lookouts vo dere Halbinsle. Unterwegs hend mir enorm vieli össerscht grossi Eidechse gseh. Nach ere erneut schöne Duschi hend mer zmörgelet und sind denn nach Airlie Beach gfahre. Dört sind leider alli Lääde zue gsi (25. Dezember), also hani für 4 $ innert 1 Schtund min Blog updatet und E-Mails gschriebe.

Morn, 26. Dezember, gohts mit Oz Sail uf es Segelboot namens „Mandrake“ für 2 Täg rund um Whitsunday Islands (inkl. Schnorchle). Hoffentlich hemmer so heisses Wetter wie hött...

Agnes Water - Rockhampton (Yaamba)

Nach 1 Schtund Internet ide Bibliothek vo Agnes Water (woni de letschti Iitrag gmacht ha) am Ziischtig, 23. Dezember, sind mir uf Umwege (via Lowmead uf ere unteerte Schtross… arme Campervan) nach Rockhampton gfahre. Unterwegs hend mir öises erschte wilde Känguruh zäme mit eme junge gseh. Rockhampton wird als „Rinderhauptschtadt vo Auschtralie“ bezeichnet. Sie wird ihrem Ruef gerecht: ned bsonders interessant und wie vermuetet sind d’Lüüt nömm so hübsch. =o) Zerscht hend mir vergeblich nach eme Internetzuegrif gsuecht. Es gäbt scho es paar, aber die Gschäft sind alli bereits zue (chürzeri Öffnigsziite um d’Wiehnachte ume). Also hend mir öis es sehr feins T-Bone-Steak im Great Western Hotel gnehmigt. Nachher sind mir go iichaufe und nach Yaamba uf en Raschtplatz gfahre, wo’s möglech esch, gratis z’übernachte. Freiwilligi us de Region schpendieret eim do Tee, Kafi und unendlich viel feini Chrömli bis um Mitternacht. S’Ziel vo dem Ganze esch, d’Lüüt zunere Pause vom Fahre z’bringe, denn überall uf em Bruce Highway sind Schilder wie „Break your drive, stay alive“ oder „Rest or R.I.P“. De endlos langi Highway esch scho recht ermüedend zum Fahre. Im Wicked-Laughs Büechli hend mir no es paar gueti Witz glääse, zum Biischbiel:

Recycle underwear! Save on washing and be eco-friendly. Get 4 days use out of one pair of underwear by wearing them frontwards, backwards, inside out frontwards and inside out backwards.

Oder au es paar frauefeindlichi: How many men are used to open a beer?
None, it should already be open when she brings it.

Känguruhs am Cape Hillsborough Beach

Carlo Sandblow

Wicked Camper

Miis Gepaeck

Brisbane - Agnes Water/Town of 1770

Am Donnschtig, 17. Dezember bin ich zobe in Brisbane aacho. Unterwegs zur Unterkunft hani mit 3 Penner gschnorret und mit ihne Wii trunke. Einzigartig gsi.

Fritig, 18. Dezember: Nachem Zmorge bin ich go de Wicked Camper abhole. Mir hend de VON DUTCH Camper mitem Schpruch NUKEN N DE KUKEN. :o) Nachem Tanke (Camper leer bechoo, soetted au wieder leer abgaeh) und em Uuswechsle vom fascht abgheiende Usseschpiegel bin ich vo Brisbane nach Noosa go de Rene abhole. Vor de Schuel hemmer ois vom Nathan ond vom Yoon verabschiedet, sowie im Lions Park no vom Michu, bevor mir nach Rainbow Beach gfahre sind. Doert hemmer naeb de Schtross uebernachtet, da`s schoescht niened erlaubt gsi esch, de Camper anez`schtelle. Zum 1. Znacht hemmer welle Teigware choche, aber de Gas-Chocher esch leer gsi. Leer bechoo vo Wicked Camper!

Die noechschte 3 Taeg und 2 Naecht hend mir uf Fraser Island verbrocht, mit ere gfuerte Tour vo 20 Luet. Es esch eifach wunderschoen gsi, die Insle. Einzigartig, faszinierendi Landschafte. Jede See, wo mir bsuecht hend, het en anderi Farb gha (rot Lake Boomanjin, klar und blau Lake Birrabeen und gruen Lake Wabby). Choennt no vell schriibe, ha aber kei Ziit.

Denn esch scho Maentig Nomittag, 21. Dezember gsi. Nach de Fraser Tour sind mir z`Rainbow Beach no zur Carlo Sandblow und obe ade Coloured Sands gsi. Hoffentlich gets kei Problem bem Heifluege, well ich es Schtueck Coloured Sand iipackt ha...

Nach ere Nacht in Rainbow Beach sind mir am Zischtig, 22. Dezember, Morge am Achti in Tin Can Bay go d`Delfin-Fuetterig luege. Denn sind mir wiitergfahre nach Maryborough, de Geburtsort vo de Erfinderin vo Mary Poppins. Oisi Fahrt esch wiiter gange nach Bundaberg, wo de bekannti Rum und s`Ginger beer her chonnt. D`Besichtigung und s`Deguschtiere vode Rumfabrik esch interessant gsi, aber 25.-- sind chli vell gsi. Ide Nacht sind mir denn in Mon Repos go d`Schildchroett aaluege, wo an Land choemed cho Eier ablegge. Iidruecklich gsi. Leider hets heftig afo raegne, alles esch nass gsi und de Camper dreckig und voll Sand (waege oise nasse, sandige Chleider und Bei).

Hoett esch Mittwoch, 23. Dezember. Immer nonig in Wiehnachts-Schtemmig. Mir sind fangs vo Bundaberg nach Agnes Waters/Town of 1770 gfahre. Jetzt hemmer 1 Schtund lang Internetzuegriff und ich ha darum alles so kuerzt i dem Post do. Mer waerdet no wiiterfahre bis nach Rockhampton, de Rinderhauptschtadt vo Auschtralie. Soett offebar nuet schpeziells sii, haesslechi Luet, wie ueberall im Hinterland, wo mer sin Body ned am Schtrand muess zeige und offebaar au kei interessanti Schtadt, hani voruus ide Schwiiz ghoert. Mol luege. Mir waerdet doert uebernachte. Zerscht wend mir aber es saftigs Steak aesse doert.

Ich hoffe, dass ich bald wieder mol Internetzuegriff ha. Soescht do mol en Uusblick: Morn waend mir vo Rockhampton bis nach Cape Hillsborough fahre (langs Schtueck). Denn an Wiehnachte, 25. Dezember, waend mir in Airlie Beach aacho, wo am 26. Dezember oise Whitsunday Sailing trip aafoht (2 Taeg lang).

Sunrise

Nimbin

Byron Bay Teil II

Zischtig, 15.12.: Jetzt bin ich zwar scho sit 2 Täg do, aber ich ha erscht hött Morge erfahre, dass do wieder en anderi Ziit herrscht. Während em Zmörgele esch eini zu mir cho und het mich gfrogt, ab wenn d’Reception bsetzt seig. Ich ha gseit, dass es wohl ab ca. 8:00 sii wird und zeig ihre mini Uhr, wo 7:07 zeigt. Naja, nachdem sie mir gseit het, dass do d’Uhre nomol 1 Schtund wiiter vöre gschtellt wärde müend, hani no bi de Reception nochegfrogt und die hend mir das Ganze erklärt: Auschtralie het zwar nur 3 verschiedeni Ziitzone und es esch zwar die gliichi Ziitzone do in Byron Bay wie in Brisbane oder Noosa, aber ide Schtaate New South Wales und Victoria wird zwösche Oktober und März uf Sommerziit umgschtellt, in Queensland ebe ned. Und Byron Bay esch nömm in Queensland, sondern im Norde vo New South Wales. Darum hani mini Uhr halt nomol 1 Schtund vöregschtellt. Abem Donnschtig, 17.12., wird ich denn wieder „nume“ no 9 Schtunde voruus sii gägenüber de Schwizer Ziit, well ich denn wieder in Brisbane, de Hauptschtadt vom Schtaat Queensland wird sii. Zum Glück bin ich gnueg früeh uufgschtande, schöscht hätt ich nämlech min Abholservice zum Fallschirmschpringe verpasst, wäge dere Ziitgschicht.

So bin ich denn vom Steve mit ere Engländerin und ihrem Frönd nach Ballina gfahre worde, wo mer öis uf de Schprung vorbereitet hend. Ha gmeint, dass ich in Byron wird gumpe, aber Ballina esch au guet, denn landschaftlich esch es genau gliich und de Landeplatz ufeme Rasefeld näbem Fluss wo do grad is Meer mündet, esch au in Ordnig. Denn sind d’Engländerin, ihre Schpringer, und ich mit mim Schpringer namens Dan zum Flugplatz gfahre, wo mir mitem Pilot zäme i d’Cessna oder Piper iigschtiege sind, wo bereits parat gschtande esch. S’Wätter esch ned so super gsi, es esch zwar rächt warm gsi, aber es esch grau und bewölkt gsi. Uf 8‘000 Fuess sind mir denn usem Flugzüüg gumpet. Wow, da esch s’einzige Wort, wo zu dem Erläbnis passt. Es esch scho nome rächt interessant gsi, z’erläbe, wie heftig dass es chuutet, wenn uf dere Höchi en Flugzüügtüre uufmachsch. Andersch als erwartet hani ned die ganzi Ziit es Kribble de Rücke durab gha, denn ich ha gmeint, de Schprung chönnt gfüehlsmässig öppe so schtruub sii wie de Giant drop im Dreamworld, woni 119 Meter freie Fall erläbt ha. Nachem Öffne vom Schirm uf ca. 4‘000 Fuess hani sälber dörfe länke und ha en Spin gmacht (Schpirale). Eifach unbeschriiblech gsi. Öppe 10 Minute nachdem mir sanft ufem Arsch glandet sind, hets afo rägne. Glück gha, denn Rägetropfe seiged chli schmerzhaft während eme Schprung. De Steve het mich denn wieder zrugg zur Unterkunft gfahre. Nach eme feine Salat zum Zmittag hani zerscht dänkt, ich chönnt no go jogge und/oder baade, aber es het denn afo rägne. Obwohl s’Wätter denn besser worde esch, hani en fuule Tag gmacht, Blog-Iiträg gschriebe, Musig glost und mich übers Gleitschirmflüüge uf de Website vode Flugschuel Emmetten informiert (www.flugschule-emmetten.ch). Natürlech hani denn au wieder mis Buech packt und ha’s mir ide Hängematte bequem gmacht, bis ich vode Mozzies (Mosquitos) verschtoche worde bin.

Mittwoch, 16. Dezember: Mit über 20 Minute Verschpötig bin ich vom Jim zu Jim’s Alternative Tour mit eme alte Bus und gueter Musig abgholt worde. Nachem Lüüt iisammle in Byron sind mir nach Nimbin, das esch glaub s’bekanntischte Hippie/Kiffer-Dörfli vo Auschtralie. Es beschtoht us wenige Hüüsli und Barackene. Das heisst: mitem Velo cha mer in öppe 45 Sekunde durchs ganze Dorf fahre. Alles esch bunt und überall sind ganz schpezielli Gerüch ide Luft. Es get zwar au en Polizeischtation, aber de Drogehandel und -konsum wird toleriert. Und so cha’s sii, dass mer innert wenige Schtunde locker 6 Mol gfrogt wird, öb mer „öppis“ möcht chaufe. Am Zwöi sind mir denn witergfahre zuneme 62-jährige Hippie, wo zmittst im Rägewald inere Hütte aneme Teich wohnt und luuter Ramsch um d’Hütte het. Nachem Macadonia-Nüss und exotischi Beeri sowie Wassermelone Ässe, sind mir no churz durch „sin Urwald“ gloffe, bevor mir mitem Bus zu Minyon Falls gfahre sind. Da esch en Schlucht zmittst ineme Nationalpark (Rägewald), wo öppe 122 Meter schteil dorab goht. Schöni Uussicht gsi. Ufem Weg zrugg nach Byron hani min erschte, wild lebende Koala ide Böim entdeckt. Churz drufabe hemmer nomol zwöi gseh ide Böim ganz nöch zu de Schtross. In Byron bin ich denn is Cheeky Monkeys go Znacht ässe. Da esch es Restaurant und en Bar. Zrugg ide Unterkunft hani mich wieder mol as Packe gmacht.

Donnschtig, 17. Dezember: Sogar ohni Wecker bin ich bereits am halbi Föifi uufgschtande und bin zum Lüüchtturm jogget. Esch no rächt dunkel gsi. Am 5:40 esch denn d’Sonne uufgange und ich ha es paar schöni Fötteli chönne mache. Zrugg ide Unterkunft hani duschet, fertigpackt, zmörgelet und uus-checkt. Denn hani no a mine Blog-Iiträg gschaffet und im Buech glääse. Naja, vell hani nömm gmacht bis ich am Vieri de Greyhound Bus zrugg nach Brisbane gnoh ha. Uhr wieder 1 Schtund zruggschtelle! Also wie vorher wieder „nur“ no 9 Schtund voruus. Hött het de Honki Geburtstag.

Most easterly point of Oz

Byron Bay Lighthouse

Aaschtelligs-Vertrag unterschriebe

Byron Bay Teil I

Sonntig, 13. Dezember: Wie bereits erwähnt hani in Brisbane am Morge am Sebni de Bus nach Byron Bay gnoh. Dört bin ich bereits am 10:20 aacho, ned wie ufem Ticket erwähnt am 11:05. Nachdem ich zerscht de falschi Shuttlebus gnoh ha, denn minere Unterkunft namens Cape Byron Lodge vergeblich probiert ha aazlüüte, bin ich gemäss de Uuskunft vom Tourismus-Hüüsli halt gloffe. Nach ca. 25 Minute hani denn iicheckt und well ich gloffe bin, het mir de Receptionist s’Passwort für WiFi Internetzuegriff gäh. Die 2. Hälfti vom Tag hani im Schtädtli verbrocht, woni bin go lädele. Nachem Baade am Main Beach bin ich mich im Woolworths mit Läbensmittel für die nöchschte paar Täg go iidecke. Zrugg ide Unterkunft hani dank em unlimitierte Internetzuegriff viel Ziit a mim eigne Laptop verbrocht und es paar Blog-Iiträg gmacht. Zobe am halbi elfi esch es immerno mega warm gsi.

Mäntig, 14. Dezember: Am Morge am Sächsi langsam uufgschtande, s’Turnzüüg aagleit und go jogge. Zum Glück hani d’Kamera mitgnoh, denn so hani es paar schöni Fötteli chönne mache bem Lüchtturm am öschtlichsche Punkt vo ganz Auschtralie. Wiiter osse ufem Meer sind grossi Frachtschiff duregfahre, aber ich ha kei Delfin gseh, wo do zwar hüüfig i dere Ziit z’gseh sind. Nach öppe 2 Schtund Jogge/Sightseeing bin ich zrugg be de Unterkunft gsi. Nachere aagnehme chalte Duschi hani d’Mango gässe, woni unterwegs für 2 $ kauft ha. Abgseh vo de Sauerei wo bem Ässe entschtande esch, esch das seehr fein gsi. Es esch definitiiv nonig die letschti Mango gsi, woni gässe ha. Denn hani s’erscht Mol inere Backpacker-Unterkunft gwäsche und aaschlüüssend Blogtext gschriebe. Zudem hani no per Telefon mis Skydiving-Adventure bestätige loh (ich wird morn am nüüni be minere Unterkunft abgholt).Am Nomitag hani s’Couvert mitem unterschriebne Vertrag in drüüfacher Uusfüehrig be de Poscht abgäh für Standard Luftposcht (schpäteschtens i 10 Täg ide Schwiiz, für 2.20). Aaschlüüssend bin ich an Schtrand gläge und ha wieder mol i mim englische Buech „A long way down“ vom Nick Hornby wiiterglääse. Well’s scho de ganzi Tag zwar rächt warm gsi esch, aber de Himmel immer grau und bewölkt gsi esch, bin ich ned go baade. Es esch au rächt windig gsi. Brot mit Vegemite, en Banane und en Öpfel und es Rüebli sind mis Znacht gsi am Schtrand. Zrugg in Cape Byron Lodge hani s’feine Ingwer-Bier vo Bundaberg gnosse, woni unterwegs ineme Bottleshop kauft ha (Alkohol esch nur i dene Gschäft erhältlich, ned im Supermarkt). Denn hani wieder im Buech glääse, well’s mich jetzt packt het und d’Gschicht interessant worde esch.

Brisbane

King George Square, Brisbane

1 day & 2 nights at Brisbane

Nacheme churze Aaruef esch mich eine vom Bunk Backpackers (mini Unterkunft) mitem Büssli cho abhole am Roma Street Transit Centre in Brisbane, woni mitem Greyhound Bus aacho bin. Zum Znacht hani hauptsächlech vo mim feine Läbchueche gläbt. Mega cool iigrichteti Unterkunft, suuber und het grad en Durchgang zum Birdee num num (en Bar). Mini 7 Zimmerfrönde sind rächt chaotisch gsi. Nach eme Pure Blonde Bier und eme "jug of Strongbow" esch de Obe denn au scho verbii gsi, denn d’Ire, woni kenneglehrt ha, sind wiiterzoge.

Am Samschtig Morge am halbi Sebni bin ich uufgschtande und im nöche Chinatown ineme Café go zmörgele. Am Achti esch immerno keine vo de chaotische Zimmergenosse wach gsi. Ich bin losgloffe i d’Schtadt, woni denn am elfi uf en Gratis-Schtadt-Tour gange bin. Und zwar en umweltfründlechi, denn mer sind alles gloffe. Es esch sehr interessant gsi, ich ha vieles glehrt und gseh. Naja, ganz gratis esch d’Tour au ned, sie läbt vom frei wählbare Trinkgeld, wo mer am Schluss cha gäh. Dank de Demo für Klimaschutz, wo scho de ganz Tag vor de City Hall ufem King George Square schtattfindet, han ich be cooler Openair-Musig es meeega feins vegetarischs Menu für nur 5 $ chönne gnüsse.

Zrugg im Bunk Backpackers bin ich churz is Internet go E-Mails checke. Und denn hend die andere Backpacker um mich ume voll schräg gluegt, woni vorem PC ha afo juble, denn…

ICH HA D’ZUESAAG BECHOO FÜR D’SCHTELL BEM CHREISKOMMANDO AARGAU,

woni mich 2 Täg vor de Abreis bin go vorschtelle. YEEEAAAH! Das heisst, dass ich chli unbeschwerter cha umenand reise, dass mich dehei denn es wiiters Abentüür erwartet und dass de Blick uf de Konto-Uuszug jewiils Endi Monat mit de Ziit hoffentlich au wieder chli freudiger wird sii. Ich ha zum Glück i dere Jugendherberg de Vertrag grad 3x chönne uusdrucke und sött die 3 Exemplar unterschriebe so schnäll wie möglech per Luftposcht retourniere.

Am Obe hani alles vorbereitet, so dass ich am nöchschte Morge de Finn unter mir und die beide Schwede näbedraa oder au die andere im Zimmer ned gweckt ha, denn ich bin am Viertel ab Föifi uufgschtande und mit Sack und Pack ca. 30 Minute zrugg zum Greyhound Transit Centre gloffe, woni am Sebni de Bus nach Byron Bay gnoh ha.

Farewell with class mates

Partyyyy!

Múcio & me

VB

Fortsetzig vo letschter Woche in Noosa

Donnschtig, 10. Dezember: Ich bin mit em Päckli i d’Schuel gloffe. I däm Päckli hani luuter Proschpäkt, Souveniir, es paar Chleider und vieles meh, woni uf de Reis ned bruuche wird. Nach de Schuel hani bereits mis Zertifikat bechoo, damit ich das zäme mit de Schuelbüecher au grad heischicke cha. Uf de Poscht het sich zeigt, dass es 7 Kilo schwer wär. Das wär scho rächt tüür worde. Darum hani halt wieder einiges usegnoh, sodass ich denn aber trotzdem no über 50.-- für es Päckli vo 5 Kilo zahlt ha. Und das per Sea mail! Es wird in ca. 3 Mönet dehei aacho. Wenn ich’s per Luftposcht wörd schicke, wär’s in 2 Woche dehei, aber es wörd über 120.-- choschte aber es het jo nüüt drin, wo enorm dringend dehei sött sii. Denn bin ich direkt go tschutte mit vielne andere vode Schuel. Ich weiss jetzt, was ich vermisse: de Teamschport. Ich sött glaub doch afo so blödi Üebige wie Rumpfbüügine mache, denn wenn ich jetzt denn nömm ide Schuel bin, esch Teamschport nömm möglech, ich ha’s jo jetzt scho vermisst, obwohl ich wenigschtens 1 Mol ide Woche ha chönne ide Hitz go umeseckle und alli Cookies useschwitze. D’Sharon und de Kyle sind weg am Obe und ich ha fixfertig packt und no per Telefon wie vorgschriebe 1 Tag vorher d’Unterkunft in Brisbane beschtätige loh. Sämtlechi Aktivitäte und Unterkünft müend gemäss Tribaltravel 1 Tag vorher per Telefon bestätigt wärde und ich sött denn jewiils au aalüüte, wenn ich voneme Transit Center wott abgholt wärde. Jetzt no en halbe Tag Schuel und denn esch mini Ziit be de Familie und ide Global Village Schuel verbii. Dementschprächend hani en rächt coole letschte Obe gha ide Koala Bar und im Irish Murphy’s. Ich bin bachnass vom Umetanze und es het es paar witzigi Fötteli gäh. Öppe Morge am halbi drüü bin ich denn is Bett.

Fritig, 11. Dezember: Hött Morge nach de Pause hend mer ide Klass de Abschied vode Delphine (Neuchâteloise), em Mucio (Brasilianer) und mir gfiiret. Für das hani de ganz Läbchueche iipackt, denn d’Familie het ned gärn Zimt. Schlussändlech han ich vergässe, de Läbchueche z’serviere, doch das esch umso besser für mich gsi, denn so hani während de folgende Täg in Brisbane und au no in Byron Bay de ganz Läbchueche elei gässe…hihi. Mir hend gnueg anders gha zum öise Abschied fiire. Eventuell hani jetzt de Yoon, mini Lehrerin Annette und alli andere vo minere Klass zum letschte Mol gseh. Mitem Südkoreaner Yoon sött ich unbedingt in Kontakt bliibe, er esch en zwäge Cheib. Er cha sogar chli düütsch (Du bist hübsch. Holen Sie mir bitte ein Bier. Sonne.), das lehrt er offebaar in Südkorea ide Schuel uf sim Weg zum Aawalt oder Autor.

D’Sharon, mini Host mother, het mich am halbi drüü zum Noosa Transit Center gfahre während ihrer Mittagspause. Es paar Sache vo mir wird ich inere Woche wieder go abhole, wenn ich mitem Campevan vo Brisbane her chome. Mit chli Veschpätig bin ich denn am 15:50 per Greyhound Bus nach Brisbane gfahre. Es esch en enorm heisse Tag gsi und ich ha 2 schweri Rucksäck gha.

Noosa Heads Fire Station

Das esch die kompletti Füürwehr vode Schtadt Noosa & Umgebig. 2 Fahrzüüg! Dass das längt...? Velecht esch die Bruefsfüürwehr sooo vell besser als mir Hobby-Wasserschpritzer, dass sie ned meh Material bruuchet...hihi

Letschti Woche in Noosa

Was ich nonig erwähnt ha, esch, dass ich vom Chef vom Backpackers in Paradise vor de Big Night Out es paar DC Jeans bechoo ha, denn mit mine churze Hose wär ich ned i d’Clubs cho. Cooli Sach gsi.

Mäntig, 7. Dezember: Am Morge i d’Schuel gloffe, denn ich bin jo nach em Gold Coast Trip sozäge dehei abgsetzt worde. Und denn das: Irgend en ***zensuriert*** Baschtard het mis Bike klaut!! Weg, eifach alles weg, Helm, Schloss und Bike. Debii han ich’s im Veloschtänder vor de Schuel zäme mit vielne andere gloh und ha’s erscht no so abgschlosse, dass s’Schloss durch de Rahme, s’Vorderrad und de Veloschtänder goht. Bitter, denn so hani ned nor mindeschtens 100.-- verlore, sondern bin au wieder össerscht immobil, denn z’Fuess esch mer nach 2 Minute scho total verschwitzt, esch aber no überhaupt niened anechoo. Und so bin ich nach de Schuel zur Polizei. Sie hends notiert und wärdet umeluege, doch sie hend au s’Gfüehl, dass ich’s ziemlech sicher nömm gseh wird. Nacheme churze schpontane Gschpröch mit eme Füürwehrmaa be de Fire station wo grad gägenüber gsi esch, bin ich heigloffe (wie schön wär’s jetzt es Velo z’ha). Ich sött ide Schuel no mis Inserat am Pinboard wegnäh, wo druff schtoht, dass ich es Velo z’verchaufe hätt…

Ziischtig, 8. Dezember: Ide Schuel sind wieder es paar nöii Schüeler cho, unter anderem rächt vell Saudis, wo do zäme Englisch lehret, well sie das denn für ihri Uusbildig zu Helikopterpilote bruuchet. De Abdullah vo minere Klass het gseit, dass „Muhammed“ be ihne als „Freund“ bruucht wird. De Chris het mir no Fotos gäh vom Gold Coast Trip noche. Am Nomitag hani blau gmacht und bin in Tribal shop, um es paar letschti Froge z’kläre. Fazit: I dene 1‘800.--, woni für de 2. Teil vo minere Reis zahle, sind d’Flüg nonig inbegriffe! Bin chli enttüüscht. Offebaar sind vor allem d’Kangaroo Island- und d’Great Ocean Road-Toure rächt tüür. Es sind halt au beides 3 Tages-Toure inkl. Ässe & Schlofe. Somit hani hött mol de Flug vo Cairns nach Alice Springs buechet (nur mit Qantas möglech für satti 337.--). Nachem Wäsche & bereits chli Züüg zämepacke bin ich zäme mit ca. 37 andere (hauptsächlech Schwiizer) Schüeler as BBQ für 15.-- im Lions Park be einere vo dene überall sichtbare öffentliche Grillplätz. Mer hend zäme iikauft, sind per Bus in Park und hend en össerscht gmüetleche Obe gha mit Toohey’s- und VB-Bier, Wii, Wörschtli, Känguruh-, Poulet- und Chalbfleisch, Hamburger sowie Brötli, Peperoni und Chips. Es het veli loschtigi Momänt gäh und ich bin ganz nöch zuneme Pelikan cho.

Mittwoch,9. Dezember: Nach de Schuel hani im Tribalshop de letschte beide Flüg buechet (vo Melbourne nach Sydney am 27. Januar und vo Sydney nach Brisbane am 3. Februar). Die choschtet je 80.--. Anschtatt an Sunrise Beach go bade hani entschiede die bereits kaufte Zuetate für de Läbchueche z’bruuche, obwohl mini Host family kei Woog het. Es esch en schnälli Sach gsi und trotz Handglänk mol pii Mängene tiptop worde. Als Schläckmuul macht natürlech au „s’Ufruume“ Schpass. Zobe hani wieder es paar nöii Iiträg im Blog gmacht und per Skype mit de Muetter gschnorret.

Ab jetzt denn wärdet nömm so hüüfig nöii Iiträg z’gseh sii, da ich für das Internetzuegang bruche wird, woni je nachdem ned grad haa wird und ich sött denn ame zerscht überhaupt mol d’Iiträg schriibe.

Surfers Paradise Beach view

Sufers Paradise street view

Dreamworld

Weekend vom 5./6. Dezember (Gold Coast Trip)

Samschtig Morge, 7:15 mitem Velo zur Schuel gfahre. Vo dört sind mir ca. 20 Persone gsi, wo ineme chliine Büssli uf dä Trip gange sind. Zerscht zu de Funparks Dreamworld und Whitewaterworld, wo mitenand verbunde sind. S’einte esch en Art Europapark, s’andere wie s’Alpamare (aber alles verusse, well’s do jo immer schön esch). So bin ich z.B. uf de Giant Drop, da sind 119 Meter freie Fall voneme Turm. Wahnsiinsgfüehl, riesige Adrenalinkick. Oder uf de Cyclone, en Achterbahn wie d’Silverstar, aber mit 2 Loopings. Denn bin ich natürlech au uf d’Motoracer-Achterbahn, wo ufeme Töff hocksch und en Achterbahn absolviersch. In Whitewaterworld bin ich denn uf en Wasserrutschbahn, wo mitem Gummiböötli mehrmals au wieder de Berg doruuf rötschisch (ned nur immer abe). Einzigartig, funktioniert glaub mit Druckluft, me erkennt und merkt jedefalls nüüt, es esch eifach schräg, wenn zäme mitem Wasser de Hügel doruuf flitzisch.
Am Föifi sind mir denn witer nach Surfers Paradise zu de Jugendherberg namens Backpackers in Paradise. Wie au scho ide Themepärk sind wildi Ibis-Vögel do ade Gold Coast überall umenand. Nachem Znacht esch es losgange mit de BIG NIGHT OUT. Luuter Backpackers, total in 4 Clubs gange, i jedem Club 1 Gratisdrink gha und en witzige Schtroh-Huet bechoo. Es esch en interessanti Sach gsi, doch ganz und gar ned mini Musig und au ned mini Lüüt (vieli Schönheite, aber nüüt im Chopf). Wäge dem und wäge de Skyline mit viele Wolkechratzer, woni am nöchschte Morge nach 3 Schtunde Schlof wieder gseh ha, woni an Schtrand bin go baade, hani gmerkt, dass do keis schöns Läbe für mich wär und ich eidüütig vom Land chome (zum Glück). Alles esch do ade Gold Coast voll uf Kommerz uusgrichtet.
Am Sonntignomitag sind mir denn in Bribane is DFO (Discount Factory Outlet). Es esch iigrichtet, wie es Shoppingcenter. Vieli Marke hend ehri einzelne Lääde. Ich ha mir Chleider vo Billabong, Quiksilver und Rip Curl gleischtet, durchschnittlich für 30.-- pro T-shirt oder Hose. Wenn ich meh Ziit gha hätt, hätt ich vermuetlech de halbi Outlet kauft, doch zum Gück goht’s be mir immer sehr lang wenn’s ums Chleider-Poschte goht.

Yidaki (Didgeridoo)

Fortsetzig 3. Woche in Noosa

Am Ziischtig, 1. Dezember esch d’Maïssa (Schtadtbärnerin) nöi i mini Klass cho, ich bin also nömm de einzig Düütschschwiizer ide Klass. Am halbi Föifi sind de René und ich (zäme mit es paar hübsche, bsoffnige Auschtralierinne us de Region) dank Tribaltravel gratis uf de Noosa River Sunset Trip. Genau denn wo s’Boot losgfahre esch, hets afo räägne. Und zwar immer heftiger. Dementschprächend hets nur viel dunkli Wolke gha, de Sonneuntergang het mer sich müesse mithilf vo Bier dezuedänke. Immerhin hemmer sehr vell Pelikään gseh. Es räägnet do ned allzu oft, und scho gar ned 5 Schtonde lang, aber uusgrächnet hött muess es natürlech! Schtrosse sind Bäch, mer hätted grad so guet chönne is Meer gumpe, sooo nass sind mer gsi, nachdem mer mit de Bikes heigfahre sind. So öppis hani nonig mol ide Schwiiz erläbt. Dehei über Nacht komplette Portemonnaie-Inhalt, Rucksack und alles wo drin gsi esch, tröchnet. D’Chleider sind erscht 24 Schtunde schpöter (dank Schtewi) troche gsi. Hött hend de Raphi und s’Esthi Geburtstag, doch mis Natel het au zerscht wieder müesse troche sii.

Mittwoch, 2. Dezember: Ha gmeint, dass d’Host family und ich langsam mitenand uuschömed, doch jetzt hani feschtgschtellt, dass sie (oder d’Aya) d’Banane und s’Brot ässet, wo ich kauft ha. Und das obwohl’s no älteri, vo ihne kaufti Banane het. Underschti Schublade! Ich muess viel zuesätzlichs Gäld uusgäh wenn ich sehr viel Ässe sälber chaufe, und nachher ässed sie’s mir weg??!! Fazit: Ich sch… uf d’House rules und wird jetzt denn mini Frücht etc. i mim Zimmer bunkere. Well’s am halbi vieri wieder andersch heftig gräägnet het, bin ich ned go tschutte. Ich ha glücklicherwiis is Internet chönne und so per e-banking de Novämber-Konto-Uuszug kontrolliert (jaaah, es goht abwärts ufem Konto). Am Obe hemmer im Irish Murphy’s en Jass-Obe gmacht. Rächt amüsant, wenn 4 Schwiizer zäme uf Englisch probieret (mit französische Charte) z’jasse. De Nathan und ich hend gunne. :o) De René het hött sini Familie gwächslet und „wohnt“ jetzt in Tewantin.

Hött, Donnschtig, 3. Dezember, esch es wieder liecht bewölkt und es goht en Wind, was s’Wetter aagnehm heiss macht (Sonne gnüsse). Hani eigentlech scho mol erwähnt, dass mer Eidechsli und Geckos rächt hüüfig gseht? Geschter het sich's en Gecko im Irish Pub ufem Färnseh bequem gmacht. Ide Schuel hani hött „My hometown“ vorgschtellt, also Välte. D’Brasilianer hends rächt witzig gfonde, dass es zwar mindeschtens 4 Coiffeur het, aber kei grosse Supermarkt. Und über s’sogenannte Hochhuus hends au glachet (how many floors are there? Three?). Nach de Schuel sind de René und ich wäge Froge über öise Road trip in Tribalshop gange. De Räscht vom Tag hani zum Vorbereite vo Blogiiträg bruucht. Zum Znacht hets wieder en Schön-Ess-Challenge gäh, nämlich meega feini sälber gmachti Fajitas.

Fritig, 4. Dezember: Well 2 vode Klass göhnd, hend mir hött ide Schuel wieder emol es chliises Abschiedsfeschtli gmacht. Am Nomitag esch d’Activity „How to play a Didgeridoo“ gsi. De Scott (Lightning boy) het öis i 2 Schtonde Schritt für Schritt s’Didgeridoo erklärt (inkl. Theorie und Gschicht). Dank mine musikalische Fähigkeite bin ich eine vo de beschte Schpieler gsi. Es esch en einzigartige Nomitag gsi, mega cool, so lang Didge z’schpiele. Nume die schpezielli Atmig, wo s’Non-stop-Schpiele möglech macht, hani ned anebrocht (het niemert gschafft logischerwiis, das bruucht viel Üebig). Denn hani dehei wieder ade Blog-Iiträg gschaffet, Uufzgi gmacht und mis Züüg für de Weekend-Trip nach Surfer’s Paradise bereit gmacht.

!! Heimflug bereits 1 Woche früehner !!

Ich ha de Heimflug um 1 Woche vorzoge, vom 12. Februar neu uf de Fritig, 5. Februar, well ich denn bereits alles sött gseh ha und somit unnötigi Unterkunfts-Chöschte cha schpaare. Falls ich denn doch no lieber möcht länger do onde bliibe und nochli relaxe, chani das ganz eifach per Telefon ohni Zuesatzchöschte wieder rückgängig mache. Schöscht sött alles gliich bliibe (Flugnummere und Aakunftsziit in Zürii (12:35 am Samschtig, 6. Februar).

My class

Das esch mini aktuelli Klass. D'Lüüt wächslet fascht jedi Woche (nöii Schüeler chömed, anderi göhnd). Ned uf dem Bild esch d'Lehrerin, d'Annette (sie het s'Foti gmacht :o) ).

3. Woche in Noosa

Nach de Schuel hani am Mäntig wieder mol müesse wäsche. Zobe hani im Tribalshop min 2. Teil vo de Reiseziit afo organisiere. Nachdem mer am 6. Januar de Camper in Cairns abgäh müend, wärdet de René und ich jo s’Tauchbrevet mache während 4 Täg. Am 11. Januar esch das denn verbii und ich wird am 12. Januar vo Cairns nach Alice Springs flüüge, wo ich am 13. Januar uf The Rock Tour goh (3 Täg im Outback rund um Olgas, Kings Canyon und Ayers Rock). Ich ha jetzt gliich ned Mulga’s Tour gwählt, well die Tour do gliich tüür esch und de Tribalshop nur Guets ghört het vo dene. Grad aaschlüüssend, am Samschtig 16. Januar, finet d’Boomerang Tour vo Alice Springs durch d’Wüeschti mit Übernachtig in Cooper Pedy nach Adelaide schtatt. 2 Täg schpäter wird ich für 3 Täg und 2 Nächt uf Kangaroo Island goh (scho nome d’Fähri dört hee esch enorm tüür. Es esch ned Thomstour, doch dank em Tribal-Package-Rabatt hani ned s’Gfüehl, dass es en schlächti Idee esch, die vom Tribalshop empfohleni Tour z’mache.). Denn esch bereits Donnschtig, 21. Januar. Am Samschtig, 23. Januar, schtarted d’3-Tages-Tour rund um d’Great Ocean Road (da sött offebaar eini vo de schönschte Küschteschtrosse vo de Wält sii) und d'Grampians (schöni Landschaft). Somit sött ich denn vom 25. bis 27. Januar in Melbourne sii, bevor ich nach Sydney flüüg. Während mine 5 oder 6 Täg, woni wird in Sydney sii, wird ich no is Hunter Valley (bekannt für Wii) und zu de Blue mountains goh. Voruussichtlech am Mittwoch, 3. Februar, wird ich vo Sydney nach Brisbane flüüge, woni denn hoffentlich d’Manu cha treffe (ich ha’s probiert, doch s’Esthi chani nie träffe, ich bin immer nöimed andersch, sorry). De ganzi 2. Teil (woni wohl elei unterwegs sii wird) choschtet mi trotz Tribal-Package-Rabatt satti 1800.--. Da tönt heftig, esch es miner Meinig au. Je nachdem sött ich über en Änderig vom Trip nochedänke und mol froge, wo dass i evtl. chönnt Chöschte schpaare. Am Fritig, 5. Februar, wird Auschtralie für mich wahrschiinlech verbii sii, denn… (siehe nächster Post)

2. Weekend in Noosa (Halbziit vo Schuel & Family)

Das esch s’einzige Weekend do in Noosa, woni ned verplanet ha (letscht Weekend in Australia Zoo gange, next Weekend wird ich uf de vo de Schuel organisierti Uusflog a d’Goldcoast (Surfer’s Paradise mit Dreamworld & Waterworld) goh). Dementschprächend hani’s rächt gmüetlech gnoh. Ich bin im Tribalshop go Schulde begliiche, uf d’Poscht go Gebühre nochefroge und denn in es klimatisierts Shoppingcenter ghocket und ha rächt vell Ziit is Vorbereite vo Blog-Iiträg inveschtiert. Das esch en Fehler gsi, denn sither bin ich (vermuetlech wäge dere Klima-Aalag im Shoppingcenter) chli verchältet (Nase lauft nonstop). Es Päckli mit max. 5 kg i d’Schwiiz z‘schicke choschtet per Luftposcht 122.--, und denn wär‘s in 2 Woche am Ziel. Mis Züüg, woni ned mit uf d’Reis nimm (Schuelbüecher), chani ruhig per Sea mail schicke. Doch das choschtet au saftigi 58.--! Mol luege, öb Päckli unter 2 kg günschtiger sind… Denn bin ich wieder mol an Sunrise Beach go bade bis es Gwitter cho esch. Es sind denn aber nur paar Tröpfli gsi. So en blöde Lifeguard-Fritzli esch mit sim Jeep im Sand über min Plastiksack (mit mine Utensilie drin) gfahre, doch erschtuunlicherwiis hend Brille und Natel überlebt (aber d’Wörschtli ned, wo au no drin gsi sind). De Super Schwiizer-Qualitäts-Plastiksack vo intersport mit eme Schiifahrer droff het au müesse draa glaube. Zobe bin ich zäme mit es paarne vode Schuel in Sunrise Beach Surf Club go auschtralische Wiisswii probiere. Hött findet dehei de 1. Turnerobe schtatt (wo jo offebaar guet gloffe esch).

Am Sonntig, 29. November, bin ich nomol in Noosa Nationalpark, ha aber ossert eme rächt grosse Schmetterling kei schpezielli Tier gseh. Denn bin ich an Main Beach go bade. Dehei hani nachher Uufzgi gmacht und zum Znacht hani erschtuunlicherwiis en rächt grossi Portion bechoo (2 Steak, alli andere hend nur 1 gha, hihii). Nachem Znacht hani wieder emol es aagnehms Gschpröch mit de Sharon (Host mother) gha. Mer chömed also scho besser mitenand uus (dörf eifach ned z’vell ässe). Obwohl mich s’Ässe, woni sälber sött poschte, meh Gäld choschtet, bin ich meh oder weniger froh, dass ich d’Familie ned gwächslet ha. Hött hend de Petschii und de Wiesler Geburtstag.

Sunrise Beach

Wicked trip along East Coast

De René und ich hend folgendi Plän für nach de Schuel: Mini Ziit ade Schuel esch jo 1 Woche vor ihm fertig. I dere Woche goh ich per Greyhoundbus nach Brisbane (1 Tag, 2 Nächt), denn wiiter nach Byron Bay. Da esch de öschtlichscht Punkt vo ganz Auschtralie. Dört wird ich 3 Mol übernachte und während dere Ziit Uusflög mache (z.B. zum Hippie-Dörfli Nimbin und i die umliegende (Räge-)wälder). Aber s’Bescht woni denn no in Byron Bay mache, esch en Fallschirmsprung! YEAH! Am Donnschtig wird ich zrugg nach Brisbane goh, dört übernachte und am nöchschte Tag de Wicked Camper übernäh. Denn fahr ich demit nach Noosa und hole de René a sim letschte Schueltag ab (am Fritig 18.12.). Und denn wärdet mir für 3,5 Woche hauptsächlech im Camper läbe (Priis 905.-- pro Person). Mer wänd nach Rainbow Beach (coloured sands), Fraser Island (3 Täg gfüehrti Tour uf de gröschte Sandinsle vode Welt), Agnes Waters und Town of 1770, Cape Hillsborough, Whitsunday Islands (2 tägigi Action-Segeltour mit Schnorchle, uf Insle goh etc.), Mission Beach, Silveschter in Cairns, Daintree Nationalpark und Atherton Tablelands, bevor mir de Camper am 6. Januar in Cairns abgähnd. Denn mached mer zäme s’Tauchbrevet im Great Barrier Reef (enorm vergünschtigt, darum mach ich’s jetzt trotzdem) während 4 Täg. Und denn wird er vemuetlich in Cairns bliibe, währenddem ich i mine reschtliche 4 Woche fuer 3 Täg is Outback rund um de Ayers Rock goh will und au no de Süde (Adelaide, Melbourne, und sicher Sydney) entdecke moecht, bevor ich wieder zrugg nach Brisbane sött für de Heiflug am 12. Februar 2010.

Nögscht Woche wärdet mer nochli detaillierter informiert wärde und denn wird ich au mini Plän für nachem Trip nach Cairns im Tribalshop organisiere. Alli Aktivitäte, Campingsites, Unterkünft und de Camper wärdet im Tribalshop ineme Package zämegnoh und je grösser das Package, desto meh cha mer bi de einzene Aktivitäte und Unterkünft schpaare. So zahlet mer je 905.-- für de Camper (3,5 Woche) plus je 1313.50 für d’Aktivitäte wie Segeltour, Tauchbrevet, Fraser Island Tour etc. und d’Unterkunft waehrend em Tauchbrevet. Ich zahle zuesätzlich no ca. 500.-- für mini erschti Woche in Brisbane und Byron Bay für Unterkunft, Skydiving, Uusflög und Greyhoundbus fahre. Es esch vell Gäld, doch uf die Art (über Tribaltravel) esch alles guet organisiert, mer müend ned lang nach Sache sueche (und vergliiche) und zudem schparet mer mehreri hundert Franke (kei Witz). So waer z.B. s`Tauchbrevet elei scho 750.--, aber mir zahlet 500.-- inkl. Hosteluebernachtige.

Wallaby

2nd week in Noosa

Am Ziischtig hani im Internet Campermieti vergliche. Es get Jucy Campers, Hippie Campers, Travellers Autobarn und Wicked Campers. Wicked schiinet die günschtigschte z’sii. Es sind alles chliini Büssli, wo hinde inne us Tisch und Bänk cha es Bett gmacht wärde, evtl. hends sogar es Lavabo, e Chueelschrank und en mobile Gasherd. Denn bin ich an Sunrise Beach go bade, Chrömli ässe und Chrüüzworträtsel mache.En Gleitschirmpilot het dank em konschtante Wind vom Pazifik her choenne am Schtrand entlang flüüge. Zwöschedore en Banane oder Chrömli ässe esch mini Lösig vom Problem, dass ich be minere Host family ned so vell cha ässe. Am Obe bin ich zäme mit es paar Schwiizer Kollege is Cinema 5 do in Noosa. Für 9 $ (am Zischtig extra günschtig, schöscht glaub 11 $ dank Schüeleruuswiis) hend mir de Weltuntergangsfilm „2012“ gluegt. Esch zum Teil chli unlogisch gsi, aber schöscht en guete Film gsi. Bem Heicho am halbi eis am Morge hani gmerkt, dass ich de Huus-Schlüssel im Zimmer vergässe ha. Darum bin ich über de Gartehaag kletteret und durch d’Wäschchuchi ine (mis Zimmerfenschter wär schöscht au no offe gsi). De Buddy het zum Glueck ned lang bellet.

Am Mittwoch bin ich go Zuetate chaufe für Älpler Magrone und Läbchueche. Denn wie letscht Mittwoch go tschutte (wieder mit mega vell Lüüt vode Schuel, damol het Europa gonne). Dehei hets es feins asiatischs Ässe gäh. Hätt wie immer gärn no 2 Teller meh devoo gässe.

Am Donnschtig hani denn Älpler Magrone zum Znacht für die ganzi Familie kochet. Esch meega fein gsi (aber macht homesick (Heiweh)). Rundum glunge: D`Familie hets mega gärn gha, d’Aya au (japanischi Schüelerin, wo jo au be dere Host family wohnt und au id Global Village Schuel goht). Sie möcht, dass ich ihre s’Rezept is Englisch übersetze. Und s’Beschte am Ganze: Es het no so vell übrig gha, dass ich am Fritig endlich wieder mol en grossi Portion ha chönne ässe zum Zmittag ide Schuel.

Am Fritig bin ich denn mitem René (vo Uetendorf be Muensinge BE, 25, ide Schuel kenneglehrt, Fallschirmspringer, Gleitschirmpilot und Kitesurfer) vom eis bis fascht am Sächsi im Tribalshop gsi, zum öise gmeinsami Campertrip vo Noosa nach Cairns und alli Aktivitäte unterwegs z’bueche. Glücklicherwiis schaffed i däm „Reisebüro“ en Dütschi (Isi). So hend mir zwar öises Englisch ned chönne verbessere, aber wösset deför genau Bescheid und wösset exakt was mir so abgmacht hend. Das folgt im nöchschte Post. Witzig esch: mir hend öis für de günschtigscht Camper entschiede vo www.wickedcampers.com.au und am Obe hani vode Michaela Hautle d’Wicked Campers als Tipp bechoo. Danke trotzdem!

Ich und min pelzige Fründ im Australia Zoo

Woah... Kitesurfer!

Someone else's bike :o)

Es het unglaublich viel Töff umenand. UND NUR DIE BESCHTE!! DUCATI, YAMAHA, BUELL, TRIUMPH etc.

Egal ob Motocross, Naked bike oder was au immer. Ich ha au es Bike (siehe wiiter unde) :o)

My bike

Alexandria Bay @ Noosa National Park

Football match Europe vs. Asia :o)

My first weekend

Endlich Waschmaschine erklärt worde. S’Bike ineme Shop repariere loh und denn im Tribal Shop es Ticket für de Australia Zoo kauft (44 $ inkl. Busfahrt vo Noosa Service Center). De Kitesurfer zuegluegt und denn go bade am Main Beach. Zobe no Glückwünsch a d’Musig Aueschtei gschickt fürs Jahreskonzert und mit de Familie no churz via Skype gredet. Am Sonntig denn ebe de Uusflog in Australia Zoo (Heim vom Steve Irwin, bekannt als Crocodile Hunter). Es esch enorm heiss gsi, doch ich ha trotzdem enorm vell Krokos, Schlange, Vögel, Echse, Koalas und Känguruhs gseh (au Wombats, Wallabies, Echidnas, Emus, Dingos etc.). Wallabies und Koalas hani sogar chönne schtreichle. S’Einzige, wo no gfehlt het, sind Schpinne. Mini Wunde vom Fuessball-Schpiel noche esch glaub immerno gliich gross und sie esch immernonig zuegheilt.

Fritig, 20. November: Es esch en schöne Obe gsi und er hätt no 3 Mol so guet chönne wärde, wenn ich ebe chönnt tanze. Darum: Salsa und Standardtänz lehre esch uf minere „to do-Lischte“ zrugg ide Schwiiz. Ha nur 4 Schtond gschlofe und denn chonnt de Hammer: D’Sharon (Host mother) beschwert sich, dass ich z’viel Corn Flakes iss (en richtge Zämeschiss). Die Familie esch ächt ned so, wie en Host family sött sii. Darum ide Schuel denn au es Gschpröch mitem Homestay Office gha. Damals han ich’s no als Useforderig gseh und darum gseit, dass ich d’Familie ned will wächsle. Mittlerwiile muess ich mir immer wieder klar mache, dass es „nur“ für 3 Woche esch, doch das wärde i dem Sinn langi 3 Woche wärde. Sie het scho diversi Mol hinter mim Rugge dure zu de Chind über mich gläschteret, wirft mir vor, total unselbschtändig z’sii. Ich weiss, dass ich no sött selbschtändiger wärde, doch es esch schwierig, sich inere nöie Chochi (allgemein: Umgebig) z’rächt z’finde. Ich wär jo scho bereit, für mich chli Züüg vorzbereite und z’choche, doch das chönnt jo evtl. wieder bedüüte, dass ich z’viel konsumiere. Ich ha fangs mega Müeh demit, z’gseh, dass ich irgendwie total unwillkomme bin i dere Familie und ich trau mich gar nüüt meh z’mache (doch nüt mache esch jo ebe au falsch). Wie au immer: Ich cha ned rächt mit de Host mother über das Züüg rede, sie esch vo ihrem söschtige Läbe scho gnueg gschtresst und het eigentlich nie Ziit. S’Homestay Office vo de Schuel het gmeint: Sie sind halt ebe mega beschäftigt (das halt ich für 1 Grund, wieso sie sich so benähmed), doch wenn d’Familie durch das nömm fähig wär, en Schüeler richtig uufznäh und z’betreue, denn müessti d’Familie das sälber wösse. Naja, mit mir und de Aya hend sie 2 Schüeler. Ich söll mich mälde, wenn ich s’Gfüehl ha, dass d’Situation nömm länger erträglich esch. Ich bin mir jetzt ned sicher, öb ich die Useforderig über 3 Woche söll aanäh oder d’Familie wächsle. Ich probiers wiiterhin dure z’zieh und gseh das als en Challenge.
Am Nomittag esch de Uusflog in Noosa Nationalpark gsi mitem Don (Aktivitäte-Leiter). Mir sind nur 3 Schüeler gsi, de Räscht esch be dem heisse Wätter lieber an Schtrand. So hani veli verschiedeni Eukalyptus-Böim gseh (papiirigi, scrabbly wäge Raupe, oder „normali“ graui). Offebar esch es schpeziell, dass do d’Eukalyptus-Böim bis zum Ufer wachsed. Mackaroonga-Böim und Black boys (es enorm langsam wachsends Farn) hemmer au no gseh. Tier hemmer ned so vell gseh: Ameisenäschter ide Böim, 2 Eidechsli und es paar Vögel (vor allem Brush-Turkeys, wo aber in ganz Noosa omelaufet). Es sötted offebaar au no grösseri Echse, Schlange, Schpinne und Koalas vorhande sii, doch d’Koalas seiget sit es paar Johr nömm so zahlriich im Nationalpark. Immerhin hemmer all die viele schöne Buchte gseh. Wägere Platte am Velo hani müesse de ganz lang Weg vom Park her heilaufe.
Oh, hött het d’Lara Geburtstag.

First time surfing!

Hey mates!

Ich bin hött (Donnschtig, 19. November) zum 1. Mol miteme Surfboard is Wasser. Es esch viel schwieriger als es uusgseht (obwohl ich zu miner Verteidigung au muess erwähne, dass d’Welle viiiiel z’chlii und z’schwach gsi sind). Das Ganze esch möglech gsi well de René s’Surfbrett vo sinere Family dörf bruuche. So bin ich zäme mit ihm, em Nathane und em Yoon (Hyun Young, vo Suedkorea) an Schtrand. Dört hemmer denn au no nach Krabbe graabe und en Krabbe-Kampf gschtartet. Wenn mer sie richtig hebt, chöned sie eim gar ned chlemme. Es hätt es paar cooli Fotos gäh, wenn ich d’Kamera ned ide Schuel vergässe hätt.
Sit über 24 Schtunde lauft Brandwasser us de Schürfwundewoni sit em Tschutte ha, obwohl ich mittlerwiile 2x bin go dusche und hött au no im Salzwasser gsi bin. Jetzt goht’s ab i d’Koala Bar (KB’s) für Free BBQ und Latin Salsa Night (jaaaa, ich sött unbedingt lehre tanze). Im Irish Murphys wär glaub au no Karaoke.

Mittwoch, 18. Novämber 2009: Zum 1. Mol Kontakt mit minere richtige Familie per Skype id Schwiiz am Morge am 6:15 (21:15 CH-Ziit). Esch wörklech mega schräg, d’Sonne goht do scho öppe am Vieri uuf, am Sächsi esch scho taghell, am Achti esch es scho richtig heiss, doch deför goht d’Sonne scho öppe am halbi Sebni abe. Hött chlii aagnehmers Wätter dank Wolke. Nach Corn Flakes mit mim Bike i d’Schuel gfahre (viiiiel besser als z’Fuess).
De René (25, glaub vo Muensinge BE, au a dere Schuel, im Irish Murphy’s kenneglehrt) macht zwar 1 Woche länger, aber er chönnt sich evtl. vorschtelle mit mir zäme es Auto z’miete und d’Oschtküschte bis ufe nach Cairns z’entdecke. Aber…
1 Woche warte, bis er fertig esch?

Am Nachmittag wieder „Current affairs“ mit de Annette gha. Denn mitem Michu (Wielandt, het ade Uni Fribourg schtudiert) heigloffe. Am halbi Vieri mit ca. 20 andere Jungs vo minere Schuel go tschutte ufem Rugby-Fäld vode Sunshine Beach High School. Topskorer vo mim Team gsi :o). Nach 2 Schtunde hei go ässe (feini Glasnudle mit Poulet, zäme mit Ingwer (Ginger) gchochet). Host mother esch niidisch gsi, dass d’Wiese (uf de Poschtcharte vo Välte) be öis ide Schwiiz so schön saftig grüen sind.

Woher chömed all die viele chliine Ameisi i mim Zimmer?

Erschti Bilder (Kitesurfer, Waldbrand, mis Zimmer etc)

Dubai Airport Terminal 3

Hey zäme!

Hött, Ziischtig, 17.11., chani zum 1. Mol is Internet. Ohni Internet kei Blog, kei E-Mails und kei Skype. Zum Glück het mini Family WLAN, doch ebe: es esch sälte erlaubt, das Aagebot z’bruuche. Zerscht viellicht no chli Rückblick: S’Vorschteligsgschpröch esch tiptop gloffe, bin vorerscht ganz obe ufem Turm vode iigehende Bewärbige. De Obe mit de Fabi und de Beli esch wörklech schön gsi. E gmüetleche letschte Obe ide Schwiiz, eifach guet

Friitig, 13. Nov 2009: Letschte Tag ide Schwiiz. Am Morge be de Annemarie Gähwiler en Tramper-Rucksack gholt, well dä no besser esch als dä vo de Margrit Wächter. Denn hani afo packe. Näbedure no s’Web-Check-in gmacht (Boarding pass dihei uusdrockt). Am Nomittag go Batterie für d’Schtirnlampe poschte. Well d’Eltere zuneme Ässe iiglade gsi sind und de Chregi is JSS esch, bin ich elei gsi bis mich de Götti an Flughafe gfahre het (danke viel Mol für dä Taxi-Service). Bi de Gepäck-Uufgab: 21 kg Rucksack (erlaubt sind 30 kg), doch Handgepäck (erlaubt sind 7 kg) mit 9.6 kg z’schwer. Churz en Teil devoo in en separate Sack gfüllt, doch no vorem Iischtiige wieder alles zämepackt. Abflug ab Terminal E (ha chönne Metro fahre).
Schöne Flug gsi (Zürii by night, schöne, warme und sonnige Morge bi Aakunft in Dubai (nöis Terminal 3). In Dubai öppe 3 Schtunde Uufenthalt gha, denn ca. 10:45 de Schtart zum 14 Schtunde und 15 Minute lange Flug nach Brisbane. Gmüetlechi Sitznachbarin gha (jungi Auschtralierin ufem Heiwääg nach 3 Mönet Uufenthalt in England). Zum Flug: Ässe & Trinke ganz fein und gnueg gsi. Es wird enorm unbequem im Sitz bi soneme lange Flug. Ziitvertrieb durch Touchscreen (Video, Musig, Schpiel, Forward & downward camera am Flugzüüg). Scho wieder ned rächt chönne schlofe. Nach Aakunft bim Brisbane Airport am Sonntig Morge, 6:45, de Zoll- und Iifuehrkontrollzettel uusgfüllt (Schoggi erwähnt) und denn zum Glück als eine vo de Erschte s’Gepäck chönne vom Förderband näh und nacheme letschte Röntge vom Gepäck ohni Problem uf de Kontinent losgloh wurde. S’Wätter so früeh am Morge esch scho voll sommerlich gsi (sonnig, sehr warm (28°C)). De Fahrer vode Global Village (GV) Schuel het scho gwartet miteme „Marcel Zbinden“-Zettel. Zerscht no uf en witere Schüeler gwartet (Mario Heller vo Winikon LU, macht innert 5 Mönet Auschtralie, Neuseeland, Fiji und Hawaii). Denn 1,5 Schtund Fahrt nach Noosa (Sunrise Beach). Unterwegs scho glii s’erschte Tier gseh: Es überfahrnigs Opossum. Wenigi Kilometer wiiter es Wallaby (au überfahre). Öppe am Zähni bi de Ryder family (Sharon, Tahli, Kyle, Aya (japanischi Schtudentin wo i die gliich Schuel goht), Buddy & Fish…hihi) aacho. Gmüetlechs Huus mit Swimming pool und chli Umschwung und Garage. Per Auto Noosa zeigt. Scho seehr viel gseh: Kitesurfer und chli wiiter entfernt Waldbränd, Kookaburra, Bush Turkey und velli anderi Viecher entdeckt(aber no kei Schlange, Krokodil, Schpinne etc.). Eukalyptus-Bäum, Palme und Schtrüücher, eifach schön. Denn sind mer go Poschte. Grossi, orangschi Härdöpfel gseh. 1 Kilo Wassermelone choschtet glaub nur 1 Franke! Bis jetzt bin ich rächt fit gsi, doch jetzt merki de Jet-Lag. Vegemite und Promite sind mir vorgschtellt worde (irgendwie Brotuufschtriich us Hefe-Extrakt). Promite esch ned so bitter wie Vegemite, aber beides esch en komischi dunkelbruuni dicki Crème (wie Nutella). Well Muetter & Sohn heftig chrank sind im Momänt, hend mir eifach Pizzas bschtellt fürs 1. Znacht. Sowieso: „nur“ en Gasherd & Mikrowelle vorhande. Nach de lang ersehnte (aber ufgrund vode Huusregle churze) Duschi todmüed gsi. Mit Wasser und Strom wird sehr sparsam umgange (offebar schtoht jede Tag nur en gwössi Mengi a heissem Wasser zur Verfüegig, wenn’s bruucht esch, muess mer warte bis zum nöchschte Tag, darum gits nur 4-minutes-shower). Schoggi esch guet aachoo (massive Toblerone).

Mäntig, 16. Novämber 2009: 1. Schueltag, darum per Auto uf di Nüüni i d’Schuel bracht worde. Interview und Tescht für Klasse-Iiteilig. Ich bin im 2. höchschte Schuel-Level (vo öpe 6, „Upper Intermediate“). Seeehr viel Schwiizer a dere Schuel. Und au Oschtasiate (schprich Chineslis, Japse, Nordkoreaner etc.). Es paar Bärner Giele kenneglehrt. Supermarket (namens Coles) esch rächt nööch bi de Schuel. Esch voll schräg: Damit mer ade Fleischtheke bedient wird, muess mer es Nümmerli zieh wie im Swisscom-Shop. Am Nomittag am 2 Schuel fertg, denn wär eigentlich no 1 Schtond lang „Self-Studying“, ha das aber uf de Obe verschobe (und denn aber nochegholt!). Grad nach de Schuel mit eim vode Bärner (Michael Wielandt) zum 1. Mol an nur 10 Minute entfernte Sunrise Beach-Schtrand. Voll de Wahnsinn! Suuperfiine Sand, schön hellgääl, Wasser aagnehm warm, cooli Wälle (gnueg gross) aber en enormi Siitwärts-Schtrömig. Unglaublich, wie lang die Schtränd sind (so wiit wie me gseht). Nachem Bade ohni Uuficht sind mir schlussendlich au no churz binere markierte Schtell unter Lifeguard-Uufsicht go baade. Zrugg dehei esch d‘Familie ned ome gsi. Huus-Schlüssel bechoo. Die vorbereitete Spaghetti gässe und zobe denn is Irish Murphys Pub. Läbt glaub nur vo Schüeler vo dere Schuel (Global Vilage). Enorm tüür: 1 Pint Guinness für 6.80 AUD (chan mer eigentlich fascht 1:1 umrächne in CHF).

Ziischtig, 17. Novämber 2009: Superheiss, 35° Celsius. Vegemite und Promite uf Toast probiert. Denn i d’Schuel. Über de Mittag endlich im Coles es Prepaid-Samsung-Natel vo Telstra (beschts Netz) mit SIM-Charte poschtet (plus 30.-- Guethabe) für total $ 49.00. Am 2 anschtatt Self-studying in PC-Ruum vode Schuel ghocket, damit ich endlich cha en Skype-Termin abmache, E-Mails oder SMS (via Xtra-Zone) schicke und evtl. no en Blog-Iitrag mache, aber abgseh vo 1 E-Mail hani nüüt chönne mache, denn 1. Sind die paar wenige PCs sehr vell bsetzt und 2. Esch durch das d’Verbindig enorm laaaangsaaaam. Darum halt no wägeme Bike in 2nd Hand Shop go luege. Es Bike für 99.-- kauft, ide Hoffnig, dass ich’s denn wieder cha witerverchaufe. Rächt tüür, denn de Zueschtand esch ned wörklech toll. Velohelm obligatorisch (choschtet aber nur 5.--). Dehei glücklicherwiis doch no einisch d’Erlaubnis bechoo, s’WLAN vode Family z’bruuche. Endlich mol es gmeinsams Znacht am Tisch (und endlich en feine gmischte Salat mit Champignons, Tomate etc.). Denn Natel aktiviert und Blog updatet. Ich wird wohl witerhiin mis CH-Natel umeträäge, doch das wär schöscht mini Aussie-Natelnr: +61(0)4 272 383 30. Ide Nacht denn zum 1. Mol Rääge. Hoffentlich beschtoht bald wieder d’Möglichkeit, es paar News z’poste.

Bald esch es sowiit...

Nur no 1 Tag bis zu miner Abreis. S'aktuelle Wätter macht's eifacher, de Schwiiz de Rücke zuez'chehre (chalt, nass, grau, gruusig).

Mittlerwiile lieged die meischte Sache parat im Zimmer, doch öb das au wörklech im Rucksack Platz het..?

Mini letscht Woche ide Schwiiz:
Mäntig, 9. Nov 2009: Persönlechi Übergaab vode Bewärbig als Sachbearbeiter Administration bem Kanton (Abteilig Militär und Bevölkerigsschutz). Am Obe TV und aaschlüssend Abschied vom Turnverein ide Cactus Bar. :o)
Ziischtg, 10. Nov 2009: Iiladig zum Vorschtelligsgschprööch am Donnschtig bim Kanton durch Oberscht Stäuble. 2 Spiel vode Unihockey-Chreismeischterschaft in Aueschtei. Leider ned die gewohnti Leischtig chönne erbringe (4:5 verlore und 6:6 unentschiede (ebefalls verlore)). Abschied vo Turnverein/Daameriege im Cactus.
Mittwoch, 11. Nov 2009: Abschiedsfeschtli (Spaghetti) mit de Wonabis, Anja & Andy, Fiona und Martina. VIELE, VIELE DANK FÜR GLÖCKWÜNSCH, MUSIG, SCHOGGI, KAUGUMMIS UND WII.
Feschtli-Unterschtötzig:
Anja & Andy: Salat & Chuchi
Martina: Orange-Chueche
Miri: Fruchtsalat
Raphi: Chuchi
MERSSIII!!

Donnschtig, 12. Nov 2009: Happy birthday Sabine (Ackle). Uuslehne vo Tramper-Rucksack (min Rucksack het halt ebe doch z’wenig Platz) und Batterie-unabhängiger Taschelampe. Danke für d’Hilf, Margrit. Am Nachmittag folgt s’Vorschtelligsgschprööch und denn de Bsuech bi de Grosseltere, bevor ich de letscht Obe ide Schwiiz zäme mit de Fabi und de Beli wird gnüsse.

…und die ganzi Ziit das Gfüehl: Was hani vergässe…?

My host family

Am Samschtig, 24. Oktober, hani per Poscht Details über mini Host family erfahre. Mittlerwiile hani mis letschte Jahreskonzert mitem JSS hinter mir und ich bin hött, Mäntig, 2. November, de 1. Tag arbeitslos. Hött hani vo BIKU Languages AG witeri Infos zum Flug bechoo:
13. November 2009: Emirates Airlines (EK 86) Zürich-Dubai 6h Flug, 3h Aufenthalt in Dubai, dann Dubai-Brisbane (EK 434) 14h 15min Flug, Ankunft Sonntag, 15. November, 06:40 Uhr (Ostaustralische Zeit)

De Rückflug wird ich nach Ankunft in Brisbane no müesse uf de 12. Februar umbueche, das heisst, ich wird am 13. Februar 2010 zrugg uf Schwiizer Bode sii.

Hey there!
Min erschte Iitrag i dem Blog, als Teil vo de Vorbereitige für min Down under - Trip. Das Booklet esch übrigens min Reisebegleiter (danke an Fam. Hautle).

Bin gschpannt, was ich so alles wird mitnäh, wenn ich mini Uusröschtig uf ca. 2 Rucksäck voll sött begrenze.